«Вялікі абсалютна чалавек». Коля Лукашэнка расказаў, што для яго бацька і ў чым ягоная апазіцыйнасць
Малодшы сын Аляксандра Лукашэнкі Мікалай апошнім часам бярэ актыўны ўдзел у прапагандысцкай кампаніі свайго бацькі, якая вядзецца перад ягоным «пераабраннем», прызначаным на 26 студзеня наступнага года. Падчас канцэртаў у рамках «Марафона адзінства» ён звычайна грае на раялі, а перад чарговым выступленнем у Віцебску прапагандысты з БелТА ўзялі ў яго першае інтэрв'ю.
Сярод іншага падчас размовы згадалі, што Аляксандр Лукашэнка жартам называў малодшага сына «галоўным апазіцыянерам у сям'і», і пацікавіліся, у чым гэта праяўляецца.
Аказалася, што Колева апазіцыйнасць у тым, што ён чытае розныя крыніцы інфармацыі і на аснове гэтага стараецца «сфармаваць максімальна аб'ектыўнае меркаванне пра ўсе падзеі».
Пры гэтым ён, маўляў, мае магчымасць «сказаць тое, што я бачу, прамалінейна. І я ніколі не змаўчу, калі я ў чымсьці ўпэўнены». А паколькі нібыта часта выказвае сваё меркаванне, то таму яго і можна назваць «апазіцыянерам».
З наступных слоў, аднак, выглядае, што гэтая «апазіцыйнасць» не распаўсюджваецца на стаўленне да бацькі і ягонай палітыкі.
«Але я не магу быць апазіцыянерам у адносінах да дзяржавы, да кіраўніка нашай дзяржавы, таму што я яго абсалютная копія. Некаторыя людзі кажуць, што я адрозніваюся ад свайго бацькі. Але гэтыя людзі ці не ведаюць мяне, ці не ведаюць майго бацькі», — заяўляе Лукашэнка-малодшы.
І хоць, паводле ягоных слоў, ён «ніколі не пераносіць нейкіх ілжывых захапленняў», бацьку ён лічыць «вялікім абсалютна чалавекам».
Прытым не адмаўляе, што бацька будзе мець вырашальны ўплыў і на яго асабістае жыццё, у тым ліку ў справе выбару спадарожніцы жыцця:
«Не сумняваюся, што да пытанняў майго асабістага жыцця ён будзе ставіцца з вельмі вялікай увагай. Вядома, я яму цалкам давяраю і прыслухоўваюся да яго меркавання. Многія падлеткі спрабуюць адпрэчваць меркаванне бацькоў. Можа быць, калісьці ў мяне такое і было, але дакладна не цяпер. Я з абсалютнай павагай і вельмі вялікай увагай стаўлюся да парад бацькі. Не проста таму, што так трэба і прынята, а таму што я ў гэтым пераканаўся на прыкладзе многіх падзей: ад самых глабальных да самых маленькіх, асабістых».
Стала вядома пра смерць дзеда Колі Лукашэнкі — былога вязня ГУЛАГа, асуджанага за дапамогу «бандэраўцам»
Коля Лукашэнка гастралюе па краіне
Коля Лукашэнка сыграў на раялі на «Дні народнага адзінства». Яго тата перад гэтым прыгразіў Трэцяй сусветнай вайной
Коля Лукашэнка стаў героем расісцкіх мемаў
Лукашэнка пра свой выхад з аўтаматам у 2020-м: Коля бронекамізэльку накінуў — маці яго завыла
Канада ўвяла санкцыі супраць Колі Лукашэнкі
«Нікому не кажа, чый сын». Як у Пекіне вучыцца Коля Лукашэнка
Алексін і Тапузідзіс скончылі вайну за тытунёвы рынак Беларусі. Абодва прайгралі. А вось хто, здаецца, перамог3
Каментары
таму, што шмат у яго бабла
...
ацечэственныя прапагандысты, у адрозненне ад расейскіх, толькі зараз былі дапушчаны да цела?