Ціханоўская павіншавала Туска з абраннем на пасаду прэм'ера Польшчы
«Спадзяюся на шчыльнае супрацоўніцтва і ўмацаванне польска-беларускіх адносінаў», — напісала беларуская нацыянальная лідарка.
Святлана Ціханоўская павіншавала лідара «Грамадзянскай платформы» Дональда Туска з прызначэннем на пасаду прэм’ер-міністра Польшчы.
«Паважаны спадар Туск, віншую з абраннем на пасаду прэм’ер-міністра Польшчы. Я ўдзячная вам за ўсю дапамогу, якую вы аказвалі Беларусі на працягу доўгіх гадоў. І спадзяюся на шчыльнае супрацоўніцтва, якое паскорыць дэмакратычныя працэсы ў нашай краіне. Асабліва важна для нас вызваленне ўсіх палітвязняў, у тым ліку журналіста Андрэя Пачобута.
Я ўпэўненая, што вашае лідарства і здольнасць да стратэгічнага бачання будуць моцным стымулам для ўмацавання і развіцця польска-беларускіх адносінаў», — гаворыцца ў віншаванні.
***
Лідар апазіцыйнай дагэтуль «Грамадзянскай платформы» Дональд Туск быў учора зацверджаны на пасаду прэм'ер-міністра Польшчы. Васьмігадовае кіраванне «Закона і справядлівасці» скончылася.
«Хачу падзякаваць полькам і палякам — тым, хто ўсе гэтыя гады не губляў веры, што ўсё наладзіцца і мы выганім цемру. З заўтрашняга дня мы выправім тое, што было зроблена, каб кожны адчуваў сябе ў Польшчы як дома», — заявіў учора Туск.
Сёння, 12 снежня, Дональд Туск пакажа сваю праграму і склад урада, пасля чаго ў Сейме адбудзецца яшчэ адно галасаванне. Афіцыйна Дональд Туск зойме пасаду прэм'ера, калі яго прысягу прыме прэзідэнт Польшчы Анджэй Дуда.
Стала зразумела, чаму кіраўнік беларускага Ernst&Young не змог асабіста развітацца з калектывам4
Каментары