Kapialuš Miełanii Tramp: što chavajecca za stylnym žestam pieršaj łedzi Amieryki
Na inaŭhuracyi Donalda Trampa ŭvahu hledačoŭ adciahvaŭ šyrakapoły kapialuš jaho žonki. Za jaje vobrazam pabačyli peŭnyja simvały.
Jak piša ahladalnica imidžu palitykaŭ Vanesa Frydman na staronkach The New York Times, Džon Kenedzi na svajoj inaŭhuracyi ŭ 1961 hodzie parušyŭ tradycyi, źniaŭšy kapialuš, čym adrazu pryciahnuŭ uvahu publiki.
Miełanija Tramp zrabiła supraćlehły krok, jaki taksama vyklikaŭ žyvuju cikavaść: jana zastałasia ŭ kapielušy — šyrokim, ciomna-sinim, jaki dapaŭniaŭ palito z dvuchbortnaj zašpilkaj, spadnicu-ałovak i kremavuju błuzu.
Nadzieć kapialuš na inaŭhuracyju prezidenta nie tak užo niezvyčajna. Papiarednija pieršyja łedzi, u tym liku Mejmi Ejzienchaŭer, Nensi Rejhan i Džeki Kenedzi, nasili kapielušy ŭ dzień inaŭhuracyi. Ale hetyja kapielušy byli vykanany tak, kab nie chavać tvar pieršaj łedzi.
Kapialuš Miełanii Tramp na inaŭhuracyi vyłučaŭsia šyrokimi palami, jakija całkam chavali jaje vočy, jak byccam śpiecyjalna pazbaŭlajučy publiku mahčymaści adhadać jaje dumki. Hety aksiesuar nie tolki padkreślivaŭ zahadkavaść jaje vobrazu, ale i stvaraŭ niekatoryja ciažkaści dla muža — navat sproba pacałavać jaje ŭ ščaku vyhladała niaprostaj zadačaj.
U spałučeńni sa ščylna zašpilenym palito i błuzaj z vysokim kaŭniarom kapialuš (stvorany amierykanskim dyzajnieram Erykam Džavitsam) nadavaŭ Miełanii vyhlad niedastupnaści i tajamničaści, što niezvyčajna dla inaŭhuracyi, kali prezidenckaja siamja tradycyjna adkryta demanstruje siabie jak simvał novaha kursu krainy.
Na dumku ahladalnicy NYT, vobraz Miełanii Tramp padčas inaŭhuracyi byŭ pradumanym simvałam jaje dystancyravanaści, samastojnaści i kantrolu nad svaim publičnym imidžam. Kapialuš z šyrokimi palami i palito, jakija jana admoviłasia źniać navat u pamiaškańni, demanstrujuć jaje žadańnie zastavacca zahadkavaj i niedastupnaj.
Hetaja detal padkreślivaje jaje asabistaje niežadańnie całkam adpaviadać tradycyjam publičnaści, jakija čakajucca ad pieršaj łedzi, i namiakaje na bolš «impierski» styl prezidenctva Donalda Trampa, dzie ŭłada i dystancyja adyhryvajuć klučavuju rolu.
Zaŭvažny rezki kantrast novaha stylu z uboram Miełanii Tramp na pieršaj inaŭhuracyi ŭ 2017 hodzie. Tady jana abrała błakitny harnitur Ralph Lauren, jaki adsyłaŭ da vobraza Žaklin Kenedzi, i zastałasia biez hałaŭnoha ŭboru. Tady heta było ŭspryniata jak žadańnie prytrymlivacca tradycyj vašynhtonskaj elity. Na hety raz usio pa-inšamu.
Inaŭhuracyja stała arenaj dla demanstracyi simvaličnaj mody, jakaja adlustroŭvaje bolš hłybokija kulturnyja, palityčnyja i sacyjalnyja sensy.
Akramia Miełanii, uvahu pryciahnuła žonka vice-prezidenta ZŠA Uša Vens. Jana zrabiła staŭku na bolš demakratyčny vobraz. U jaje harderobie byli ŭbory amierykanskich dyzajnieraŭ, uklučajučy Oskara de ła Renta (jon taksama apranaŭ Chiłary Klintan i Łoru Buš na papiarednich inaŭhuracyjach) i Sierchia Chadsana. Asabliva vyłučaŭsia jaje žest pavahi da svaich karanioŭ — na viačery pierad inaŭhuracyjaj jana źjaviłasia ŭ sukiency indyjskaha dyzajniera Hauravy Hupty, addajučy daninu svajoj spadčynie.
Vobrazy pieršaj i druhoj łedzi Amieryki pakazali zruch u modnaj industryi: zamiest demanstratyŭnaha dystancyjavańnia ad siamji Tramp, jak heta było ŭ 2016 hodzie, dyzajniery pieraasensoŭvajuć svajo staŭleńnie.
Tak, kiraŭnik Oscar de la Renta Aleks Bolen zajaviŭ, što ich brend nikoli nie admovicca ad mahčymaści pracavać ź lidaram tolki na pastavie jaho palityčnych pohladaŭ i rady być častkaj inaŭhuracyjnych tradycyj. Adam Lipies, dyzajnier palito Miełanii Tramp, adznačyŭ, što tradycyja inaŭhuracyi ŭvasablaje pryhažość amierykanskaj demakratyi.
Biełaruska nie znajšła siabie ŭ śpisie vypusknikoŭ škoły — ličyć, što praz palityčnyja pohlady1
Kamientary