Žonka respublikanskaha kandydata ŭ prezidenty Donalda Trampa padtrymała prava žančyn na aborty. Takaja pazicyja supiarečyć dziejańniam jaje muža, jaki budučy prezidentam ZŠA dapamoh admianić rašeńnie Viarchoŭnaha suda ZŠA pa spravie «Roŭ suprać Uejda», jakoje dazvalała aborty na fiederalnym uzroŭni, piša Bi-bi-si.
Miełanija Tramp apublikavała karotki videaklip, u jakim, raspaviadajučy pra svaju novuju knihu miemuaraŭ, zajaviła: «Kali havorka zachodzić ab indyvidualnaj svabodzie — fundamientalnym pravie, jakoje jość va ŭsich žančyn z naradžeńnia, nie moža być nijakich kampramisaŭ». «Što na samoj spravie aznačaje fraza «Majo cieła, moj vybar»?» — praciahnuła žonka Trampa.
Rolik źjaviŭsia na nastupny dzień paśla taho, jak brytanskaja Guardian apublikavała vytrymki ź jaje miemuaraŭ pad nazvaj «Miełanija», jakija vychodziać u śviet 8 kastryčnika. U hetaj knizie Miełanii Tramp robić jašče bolš peŭnyja zajavy ŭ padtrymku prava žančyn na aborty.
«Nievierahodna važna harantavać žančynam prava samastojna prymać rašeńni ab svaich pryjarytetach pa pytańni ab tym, zavodzić ci im dziaciej, — piša Miełanija. — Pry hetym jany pavinny kiravacca svaimi ŭłasnymi pierakanańniami i nie zaležać ad jakoha-niebudź umiašańnia abo cisku z boku ŭładaŭ».
«Čamu chtości inšy, a nie sama žančyna, moža vyrašać, što joj rabić sa svaim ułasnym ciełam? Fundamientalnaje prava žančyny na indyvidualnuju svabodu, na svajo ŭłasnaje žyćcio harantuje joj uładu pieraryvać ciažarnaść, kali jana taho žadaje», — praciahvaje Miełanija Tramp.
«Abmiažoŭvać prava žančyn na vybar, ci pieraryvać niepažadanuju ciažarnaść — toje ž samaje, što admaŭlać joj u kantroli nad ułasnym ciełam. Ja praniesła hetyja pierakanańni praz usio svajo śviadomaje žyćcio», — piša žonka Trampa ŭ miemuarach.
Admiena fiederalnaha prava na aborty
Takaja pazicyja vidavočna supiarečyć dziejańniam muža Miełanii Donalda Trampa, jaki jašče padčas pieradvybarnaj kampanii 2016 hoda abiacaŭ pryvieści ŭ Viarchoŭny sud ZŠA svaich pryznačencaŭ, kab admianić Fiederalnaje prava žančyn na aborty.
Jon vykanaŭ svajo abiacańnie — i ŭ 2022-m Viarchoŭny sud admianiŭ svajo histaryčnaje rašeńnie 1973 hoda pa spravie «Roŭ suprać Uejda». Rašeńnie ŭstaloŭvała, što prava na niedatykalnaść pryvatnaha žyćcia ŭ adpaviednaści z Kanstytucyjaj ZŠA abaraniaje mahčymaść žančyny pierapynić ciažarnaść.
Paśla hetaha prava žančyn na aborty stała rehulavacca asobnymi štatami ZŠA — i niekatoryja ź ich faktyčna ŭviali zabaronu na pierapynieńnie ciažarnaści ŭ bolšaści vypadkaŭ.
U chodzie pieradvybarnaj kampanii 2024 hoda prava na aborty stała adnym z najbolš dyskusijnych pytańniaŭ. Mnohija žančyny ŭ ZŠA aścierahajucca, što ŭ vypadku pieramohi Tramp pojdzie na novyja abmiežavańni — i heta nie padabajecca navat značnaj častcy prychilnikaŭ Respublikanskaj partyi.
Na praciahu kampanii Tramp pa-roznamu kamientavaŭ prablemu prava na aborty, ale na hetym tydni ŭpieršyniu paabiacaŭ nakłaści vieta na zakon ab fiederalnaj zabaronie abortaŭ, kali jon kali-niebudź budzie pryniaty Kanhresam (imaviernaść takoha raźvićcia padziej, zrešty, vielmi nievialikaja).
U Maskvie padarvali prarasijskaha aŭtaryteta z Danbasa, jaki arhanizoŭvaŭ citušak
Kamientary
Tym časam, Tramp skaračaje adryŭ, u jaki była pajšła rasava-hiendernaja kandydatka Herys. A sama Kamała siońnia maje pieravahu mienšuju, čym kaliści Chiłary. Što navodzić na dumki tych, chto maje, čym dumać.