Ryełtar: Za 50 tysiač dalaraŭ u Minsku ŭžo ź ciažkaściu kupiš navat «babušatnik»
Kolki ciapier kaštuje žyllo ŭ stalicy i ci praŭda, što bolšaść skuplajuć rasiejcy? «Salidarnaść» pahavaryła z ryełtarkaj pra situacyju na rynku nieruchomaści.
Kolki ciapier kaštuje žyllo ŭ Minsku
Ryełtarka kaža pra ździełki ŭ Minsku: «Pa maich adčuvańniach, prykładna 40% ź ich ździajśnialisia za košt kredytnych srodkaŭ.
Kredyty sapraŭdy amal uvieś hod byli dastupnymi — da 15%. Tamu ludzi ich brali i kuplali kvatery. I amal uvieś hod kolkaść prodažaŭ była rekordnaj. Ale dva miesiacy tamu rynak stali astudžać, staŭki padniali, ciapier jany bolšyja za 17%. Heta spyniła častku achvotnych. Tamu ŭ listapadzie kolkaść ździełak ŭpała pracentaŭ na 15. Ale pakul heta jašče nie bolevy paroh. Heta značyć prodažaŭ ŭsio roŭna šmat. Ich stanie značna mienš, kali staŭka nablizicca ŭščylnuju da 20%».
Ahułam košt kvater u Minsku vyras prykładna na 10-15%.
«Za 50 tysiač dalaraŭ užo ź ciažkaściu kupiš navat «babušatnik». Pavodle apošnich źviestak, siaredni košt mietra ŭ stalicy byŭ krychu bolšy za 1600 dalaraŭ. Ale heta, viadoma, vielmi ŭmoŭna. Usio zaležyć i ad doma, i ad rajona».
Reałtarka pryvodzić svaje nazirańni: adnapakajovyja kvatery ciapier pradajucca pa košcie ad 48 tysiač dalaraŭ, dvuchpakajovyja — ad 60 tysiač, trochpakajovyja — ad 75 tysiač.
Ci skuplajuć u Minsku kvatery rasiejcy?
«Pa-raniejšamu ździełki adzinkavyja, — kaža ryełtarka. — Paśla vajny ŭ mianie było niekalki ździełak ź ludźmi, jakija metanakiravana źjechali z Rasii kudy zmahli. Na pytańnie, čamu da nas, jany tady skazali: «U vas usio ž taki spakajniej». Nie viedaju, adkul biarucca hetyja mify, što rasiejcy skupili ŭsiu Biełaruś».
Niuansy prodažu kvatery pa davieranaści
Ryełtarka raskazała pra niuansy ździełak z kvaterami pa davieranaści.
«Pa-pieršaje, kali čałaviek nie moža ŭdzielničać pry ździajśnieńni ŭhody asabista, to davieranaść pavinna być składzienaja na terytoryi Biełarusi.
Dalej važna, što ŭ joj napisana. Naprykład, u mianie pytalisia, ci možna pa pakinutaj hienieralnaj davieranaści svaju nieruchomaść padaryć. Pa davieranaści, u jakoj napisana «dazvalaju całkam rasparadžacca majoj majomaściu, u tym liku pradać maju kvateru… pa canie… i na svaich umovach», padaryć nielha.
Dla taho, kab padaryć, pavinna być metavaja davieranaść, u jakoj tak i budzie napisana: daviaraju takomu-ta padaryć svaju kvateru takomu-ta. Pry hetym paznačajecca kankretny čałaviek».
Kali ŭ kvatery zastalisia prapisanyja ludzi, heta taksama ŭskładniaje situacyju. Raniej vypisać ich pa rašeńni suda było nie składana, kaža ryełtarka, a ciapier sudy admaŭlajuć. Asabliva składana z vajennaabaviazanymi.
«Im, pierad tym jak vypisacca, treba stać na ŭlik u vajenkamacie pa novym miescy žycharstva. I voś tut, vykažam zdahadku, što vam udałosia ŭhavaryć nataryusa dać davieranaść, jakaja dazvalaje kamuści pastavić vas na ŭlik u vajenkamat, ale vajenkamat ŭsio roŭna nie zrobić hetaha biez asabistaj prysutnaści».
Biełaruska nie znajšła siabie ŭ śpisie vypusknikoŭ škoły — ličyć, što praz palityčnyja pohlady1
Kamientary