Бразілія заявіла пра намер размясціць дадатковы кантынгент на сваёй мяжы з Венесуэлай, пасля таго, як венесуэльскі лідар Нікалас Мадура абвясціў планы анэксаваць частку тэрыторыі Гаяны, паведамляе Бі-бі-сі.
Багаты нафтай рэгіён Гаяна-Эсэкіба належыць Гаяне, але Венесуэла з канца XIX стагоддзя аспрэчвае правы на яго.
У мінулую нядзелю ўлады Венесуэлы правялі агульнанародны рэферэндум па пытанні далучэння гэтай тэрыторыі. 95% выказаліся «за».
Нягледзячы на такую ўражальную лічбу, у рэферэндуме ўзялі ўдзел усяго блізу двух мільёнаў чалавек, то-бок прыкладна 10% насельніцтва, якое мае права голасу.
Але прэзідэнта Мадуру гэта не бянтэжыць, ён назваў вынікі галасавання безумоўнай перамогай і ў сераду пачаў рэалізацыю плана анэксіі Гаяны-Эсэкіба, прапанаваўшы Нацыянальнай асамблеі краіны прыняць законапраект аб уключэнні гэтай тэрыторыі ў склад Венесуэлы.
Ён таксама распарадзіўся, каб дзяржаўная нафтавая кампанія выдала ліцэнзіі на распрацоўку нафтавых радовішчаў рэгіёна.
Акрамя таго, з гэтага часу на картах Венесуэлы тэрыторыя Гаяны-Эсэкіба будзе адзначацца як частка краіны. Раней яна адлюстроўвалася заштрыхаванай — гэта азначала, што тэрыторыя спрэчная.
Гаяна прывяла свае войскі ў павышаную гатоўнасць і звярнулася ў Раду бяспекі ААН з просьбай умяшацца ў сітуацыю, якая пагражае дэстабілізацыяй усяго рэгіёна.
Бразільская армія сцягвае дадатковыя войскі і тэхніку да памежнага штата Рарайма.
Калі Венесуэла вырашыцца на ваеннае ўварванне ў Гаяну-Эсэкіба, ажыццявіць яго будзе магчыма толькі праз тэрыторыю Бразіліі. У тых раёнах, дзе Венесуэла і Гаяна мяжуюць беспасярэдне, перамяшчэнне войскаў фактычна немагчыма з-за ландшафту мясцовасці.
Бразільскае камандаванне заявіла, што ўзмацняе сваю прысутнасць у рэгіёне, каб гарантаваць неўмяшанне Бразіліі ў канфлікт.
У сераду з радараў знік ваенны верталёт Гаяны, на борце якога знаходзіліся сем чалавек. Інфармацыі пра яго па-ранейшаму няма, аднак кіраўнік Генштаба Амар Хан заявіў, што на дачыненне Венесуэлы да інцыдэнту пакуль нішто не паказвае.
Стала вядома імя чалавека, якога сілавікі назвалі першым затрыманым па справе «Гаюна»17
Каментары