EPAM pryniaŭ rašeńnie skaracić kala 2% štatu ŭ Biełarusi. Pra heta vydańniu dev.by raskazali supracoŭniki kampanii. U EPAM paćvierdzili zvalnieńni, ale nie nazvali ličby.
Kamandzie paviedamili ab skaračeńniach siońnia na anłajn-mitynhu. Usim, chto trapiŭ pad skaračeńnie, abiacali dasłać paviedamlalny list na praciahu pracoŭnaha dnia. Voś što dev.by raskazaŭ adzin z supracoŭnikaŭ:
«Kryteraŭ [vybaru supracoŭnikaŭ], jakija patrapiać pad skaračeńnie, nie ahučyli. Ale ŭsim zvolnienym vypłaciać vychadnuju dapamohu ŭ adpaviednaści z zakanadaŭstvam».
Sa słoŭ krynic, kampanija patłumačyła, što vymušanaja pajści na skaračeńni, kab aptymizavać vydatki. Va ŭmovach składanaj hieapalityčnaj situacyi, ekanamičnaha kryzisu i skaračeńnia biudžetaŭ zamoŭcami EPAM nie moža zabiaśpiečyć pracaj usich supracoŭnikaŭ.
Dakładnaja kolkaść supracoŭnikaŭ, jakich kampanija zvolnić, nieviadomaja. Pavodle słoŭ adnoj z krynic, «kali 2%, to skaračeńnie zakranie nie mienš za 100 čałaviek».
Pavodle infarmacyi dev.by, u biełaruskim EPAM na kaniec 2022 hoda pracavali 6000+ čałaviek, ź ich vytvorčych śpiecyjalistaŭ — 4500+. Pa kolkaści supracoŭnikaŭ biełaruski ofis (samy bujny da 2022 hoda) užo prajhraje ŭkrainskamu, polskamu i indyjskamu.
U samoj kampanii rašeńnie paćvierdzili:
«Skaračeńnie kamandy ŭ Biełarusi — heta ciažkoje, ale nieabchodnaje i adkaznaje rašeńnie. Jano stała abjektyŭnym adlustravańniem ekanamičnaj situacyi na hłabalnym rynku klijentaŭ za apošnija 12-18 miesiacaŭ. Supracoŭniki, jakich hetaje rašeńnie zakranuła, atrymajuć usie praduhledžanyja zakanadaŭstvam vychadnyja dapamohi i padtrymku kampanii».
Čytajcie taksama:
«Časam heta moža być łeveł daŭn». Što z pracaj i zarobkami ŭ biełaruskim IT-siektary
Za hod aktyvy EPAM u Biełarusi skaracilisia na 17%
EPAM abyšła Wargaming pa vypłacie padatkaŭ u Litvie
Wargaming źbiraje hrošy na padtrymku Ukrainy praz prodaž śpiecyjalnych hulniavych naboraŭ
Stała viadoma imia čałavieka, jakoha siłaviki nazvali pieršym zatrymanym pa spravie «Hajuna»17
Kamientary