Zahadkavaje adnačasovaje abłysieńnie va ŭsim indyjskim rajonie. Pryčynu dahetul šukajuć

Z pačatku studzienia 2025 hoda bolš za 200 čałaviek, u tym liku dzieci ad čatyroch hadoŭ, sutyknulisia z raptoŭnym i chutkim vypadzieńniem vałasoŭ, piša Bi-bi-si.

Niekatoryja ludzi poŭnaściu abłysieli, što vyklikała paniku i zaniepakojenaść u miascovych žycharoŭ i padšturchnuła miedykaŭ da pošukaŭ pryčyny hetaha fienomienu.

Anand, žychar vioski Pachurdžyra, adzin z paciarpiełych. Jaho vałasy pačali vypadać 31 śniežnia 2024 hoda. Jon pajšoŭ u cyrulniu i pahaliŭ hałavu, ale paśla adrastańnia vałasoŭ vypadzieńnie adnaviłasia.

Pavodle paviedamleńniaŭ, chvaroba pačynajecca sa śvierbu skury hałavy, paśla čaho chutka nastupaje značnaja strata vałasoŭ. U niekatorych vypadkach vałasy adrastajuć, ale pryčyna ich vypadzieńnia zastajecca nieviadomaj.

Ministerstva alternatyŭnaj miedycyny Indyi zabiaśpiečvaje pacyjentaŭ hamieapatyčnymi lekami ŭ zaležnaści ad ich simptomaŭ.

Ekśpierty rady miedycynskich daśledavańniaŭ (ICMR) razam z uradavymi ekśpiertami pačali rasśledavańnie mahčymaha faktaru, jaki vyklikaje vypadzieńnie vałasoŭ.

Navukoŭcy ICMR naviedali paciarpiełyja vioski, dzie zrabili bijachimičny analiz: uzoraŭ vałasoŭ, paznohciaŭ, kryvi, mačy pacyjentaŭ, pitnoj vady ź miascovych krynic.

Zbor uzoraŭ pravodziŭsia ŭ Dziaržaŭnym miedycynskim kaledžy Akoły, dzie ekśpierty vyvučali mahčymyja pryčyny hetaj źjavy.

Dekan kaledža, doktar Minakšy Hadžbchije, paviedamiła BBC News Marathi: «Bijapsija i analizy kryvi dakładna pakazali, što heta nie było vyklikana hrybkovaj infiekcyjaj. Heta taksama nie moža być adniesiena da jakoj-niebudź peŭnaj chvaroby. Daśledavańni praciahvajucca, kab vyjavić dakładnuju pryčynu hetaha fienomienu. My taksama analizujem roznyja pradukty, jakija vykarystoŭvajucca ŭ hetym rehijonie, a taksama krynicy vady».

Čynoŭnik achovy zdaroŭja rajona Bułdchana, doktar Amoł Hite, taksama paćvierdziŭ, što hrybkovaja infiekcyja — małavierahodnaja pryčyna, bo zvyčajna tak chutka vałasy pry joj nie vypadajuć.

Sacyjalnyja nastupstvy: dyskryminacyja i izalacyja

Masavaje abłysieńnie pryviało da sacyjalnaj izalacyi paciarpiełych. Maładyja chłopcy i dziaŭčaty bajacca havaryć pra heta, a ludziej, u jakich vypali vałasy, abmiažoŭvajuć va ŭdziele ŭ hramadskich mierapryjemstvach. Niekatorych studentaŭ dražniać u škołach i kaledžach.

55-hadovaja Parvaci (imia źmienienaje) raskazała: «U majho syna źnikli vałasy, i adrazu spynilisia razmovy pra jahony šlub. Ciapier jon saromiejecca pakazvacca ŭ vioscy».

60-hadovaja Kaviery Dchałakar raniej mieła vałasy da pojasa, ale ciapier na jaje hałavie źjavilisia vialikija załysiny.

«Spačatku vypadała pakrychu, ale kali ja rasčasałasia, vypała vielmi šmat vałasoŭ. Kali pamyła hałavu — usio astatniaje prosta vysypałasia. Mnie vielmi škada stracić stolki vałasoŭ», — skardzicca jana.

Mierkavańnie ekśpiertaŭ

Doktar Somieš Hupta, ekśpiert-dermatołah ź Instytuta miedycynskich navuk Deli (AIIMS), jaki naviedaŭ paciarpieły rajon, supakojvaje ludziej: «U tych, u kaho vałasy vypali, jany pačali adrastać. Ja nie dumaju, što prablema budzie doŭžycca doŭha. Novyja vałasy vyhladajuć zdarovymi».

Jon taksama dadaŭ: «Zdajecca, heta nie virusnaja infiekcyja i nie vielmi zaraznaja źjava».

Doktarka Šyła Hadboł, ekśpiertka Nacyjanalnaha navukova-daśledčaha instytuta pa pytańniach ŚNIDu (ICMR), raić: być aściarožnymi z šampuniami, karystacca asobnymi rasčoskami, nie panikavać.

Ci mahło heta być źviazana z ekałohijaj?

Raniej byli vypadki, kali ludzi stračvali vałasy z-za vysokaha stresu — naprykład, padčas pandemii COVID-19. Ale łakalizavany masavy vypadak, jak u Bułdchanie, nikali raniej nie byŭ zafiksavany.

Zvyčajna asnoŭnaj pryčynaj takich źjaŭ źjaŭlajecca ekałahičnaje zabrudžvańnie. Tamu čynoŭniki praviali testavańnie pitnoj vady i inšych ekałahičnych faktaraŭ: analiz hlebavych vod u paciarpiełych vioskach, dezinfiekcyja vady praz chłaravańnie miascovych krynic, kab zrabić jaje biaśpiečnaj dla spažyvańnia.

Rasśledavańnie praciahvajecca, i ŭłady spadziajucca chutka vyjavić dakładnuju pryčynu masavaha vypadzieńnia vałasoŭ u žycharoŭ Bułdchany.

• 0
• 0
• 0
• 2
• 3
• 0
• 0
• 0