Delehacyju Jeŭraparłamienta pa Biełarusi chacieŭ uznačalić litoviec, jaki ličyć pratesty 2020 hoda «vialikaj pravakacyjaj»
Partyja «Vybarčaja akcyja palakaŭ Litvy — Sajuz chryścijanskich siemjaŭ» atrymała miesca ŭ Jeŭraparłamiencie ŭ 2024 hodzie. Jaje lidar Valdemar Tamašeŭski, jaki choča naładzić adnosiny z režymam Łukašenki, uvajšoŭ u delehacyju Jeŭraparłamienta pa Biełarusi. I chacieŭ jaje navat uznačalić.
Tydzień tamu jon zrabiŭ zajavu, što Litva zrabiła pamyłku, padtrymaŭšy demakratyčnyja pratesty ŭ Biełarusi paśla falsifikavanych vybaraŭ u 2020 hodzie. Palityk ličyć, što kali b nie heta, to, mahčyma, nie było b i vajny va Ukrainie.
«Adna vialikaja pravakacyja pačałasia ŭ 2020 hodzie, paśla vybaraŭ. I zaraz my bačym, što heta była pamyłka našaj palityki — my sami sapsavali adnosiny [ź Biełaruśsiu]. Skažu bolš — zaraz Biełaruś častkova straciła svoj suvierenitet. Ale my byli vinavatyja, što padtrymali hetuju revalucyju, źjaviłasia novaja miaža pamiž Biełaruśsiu, Rasijaj i Ukrainaj», — skazaŭ jon.
Tamašeŭski ličyć, što treba palapšać adnosiny z aficyjnaj Biełaruśsiu.
«Ja dumaju, što my zrazumiejem, što heta naša pamyłka, my sami sapsavali hetyja adnosiny. Treba chutka prymać rašeńni, kab byli narmalnyja adnosiny z susiedam», — skazaŭ Tamašeŭski.
Palityk Anatol Labiedźka adreahavaŭ na hetyja zajavy. Daradca Cichanoŭskaj adznačyŭ, što chacia Tamašeŭski nie ŭznačaliŭ delehacyju Jeŭraparłamienta pa Biełarusi, adnak, kali jon zastaniecca jaje siabram, to biełaruskaja apazicyja nie budzie ź joj supracoŭničać.
Labiedźka abvinavaciŭ Tamašeŭskaha ŭ tym, što toj asprečvaje prava biełarusaŭ na sumlennyja svabodnyja vybary.
«Tamašeŭski — jon zaŭsiody na miažy prachodzić u parłamient — abo nacyjanalny, abo ŭ JEP. U situacyi biełaruskaj heta aznačała b, što ŭ jaho było b nie 5-6%, a Łukašenka daŭ by jamu 0,2%. I voś ja chaču źviarnucca, spadar, tavaryš Valdemar, što b vy rabili ŭ hetaj situacyi? Jak by vy aceńvali hetuju situacyju?»
Labiedźka skazaŭ, što litoŭski palityk admaŭlaje biełarusam u tym, što jość u Litvie. «Dla siabie vy pryznajecie demakratyju jak kaštoŭnaść, a svaim susiedziam vy admaŭlajecie ŭ hetym», — skazaŭ biełaruski palityk.
Jon taksama adreahavaŭ na słovy Tamašeŭskaha, što mahło nie być vajny, kali b nie padtrymka Litvoj pratestaŭ u Biełarusi. «Tut prosta treba ščyra skazać, što «ja chaču nie ŭ delehacyju pa Biełarusi Jeŭrapiejskaha parłamienta, ja chaču być častkaj hrupy siabroŭstva z Łukašenkam i Pucinym». Voś i ŭsio», — dadaŭ daradca Cichanoŭskaj.
Biełyja dy čyrvonyja kvietki i mora śloz. Jak u Vilni sustrakali Palinu Šarendu-Panasiuk29
Kamientary