Sotni niamieckich pratestantaŭ naviedali carkoŭnuju słužbu, jakaja była amal całkam zhienieravanaja štučnym intelektam. Čat-bot ChatGPT pravioŭ u ziamli Bavaryja 40-chvilinnaje nabaženstva, na jakim byli malitvy, śpievy, propaviedzi i dabrasłavieńni dla bolš čym 300 viernikaŭ.
Štučny intelekt byŭ «uvasobleny» avataram ciemnaskuraha pastara na vielizarnym ekranie nad ałtarom, paviedamlaje The Associated Press.
«Darahija siabry, dla mianie vialiki honar stajać tut i prapaviedavać vam jak pieršy štučny intelekt na źjeździe pratestantaŭ sioleta ŭ Hiermanii», — skazaŭ avatar manatonnym hołasam.
Aŭtarami idei takoj słužby stali kampanija ChatGPT i Jonas Zimierlajn — bahasłoŭ i fiłosaf ź Vienskaha ŭniviersiteta.
«Ja zadumaŭ hetuju słužbu, ale nasamreč ja, chutčej, akampanavaŭ u joj, bo kala 98% idzie ad mašyny. U vyniku atrymałasia dosyć salidnaja carkoŭnaja słužba», — raspavioŭ 29-hadovy Zimierlajn u kamientary The Associated Press.
U ludziej, jakija pryjšli na słužbu, była roznaja reakcyja. Chtości padpiavaŭ i zdymaŭ padzieju na telefon, a niekatoryja admaŭlalisia pramaŭlać relihijnyja słovy razam z avataram.
54-hadovaja Hajderoze Šmit skazała žurnalistam, što spačatku była ŭschvalavanaja i zacikaŭlenaja, ale potym nabaženstva ŭsio bolš «adšturchoŭvała jaje».
«U im nie było ni serca, ni dušy. Avatary nie pakazvali nijakich emocyj, nie mieli movy cieła i havaryli tak chutka i manatonna, što mnie było vielmi ciažka zasiarodzicca na tym, što jany kazali. Ale, mahčyma, dla maładoha pakaleńnia, jakoje vyrasła z usim hetym, usio inakš», — prakamientavała Šmit.
Niezvyčajnaja słužba stała adnym z sotniaŭ mierapryjemstvaŭ na źjeździe pratestantaŭ Deutscher Evangelischer Kirchenta (Asamblei niamieckaj Jevanhieličnaj carkvy) u dvuch bavarskich haradach. Nabaženstva vyklikała takuju vialikuju cikavaść, što ludzi stali ŭ daŭžeznuju čarhu jašče za hadzinu da jaho pačatku.
U jaki dzień u 2020-m mahli zdarycca pieramieny? Polski dypłamat vydaŭ knihu ab pracy ŭ Biełarusi i daŭ adkaz na heta pytańnie9
Kamientary