Deputaty Pałaty pradstaŭnikoŭ u Jeŭrapiejskim sudzie patrabavali źniać ź ich sankcyi. Nie atrymałasia
Deputaty Pałaty pradstaŭnikoŭ Nacyjanalnaha schodu Biełarusi Śviatłana Lubieckaja i Alaksandr Amieljaniuk sprabavali asprečyć sankcyi, jakija Jeŭrapiejski sajuz nakłaŭ na ich 21 červienia 2021 hoda. Jeŭrapiejski sud u Luksiemburhu pastanaviŭ adchilić pazoŭ i abaviazaŭ zajaŭnikaŭ apłacić vydatki adkazčyka, piša reform.by.
Lubieckuju i Amieljaniuka pradstaŭlaŭ advakat Advakackaj pałaty Paryža Dźmitryj Lićvinski. Jany trapili ŭ sankcyjny pakiet ES 21 červienia 2021 hoda ŭ suviazi z tym, što ŭznačalvali Pastajannuju kamisiju pa zakanadaŭstvie i ŭdzielničali ŭ raspracoŭcy i pryniaćci represiŭnaha zakanadaŭstva ŭ dačynieńni da ŭdzielnikaŭ mirnych pratestaŭ.
Pradstaŭniki biełaruskaha režymu chacieli źniać u dačynieńni da siabie sankcyi i patrabavali apłacić vydatki, źviazanyja z sudom.
Jany matyvavali heta tym, što sankcyi nosiać charaktar kalektyŭnaj adkaznaści, niasuć pamyłkovuju acenku i parušajuć pryncyp suraźmiernaści.
Akramia taho, padčas słuchańniaŭ zajaŭnik udakładniŭ, što nie mieŭ namieru zajaŭlać ab parušeńni svabody słova, što było adznačana ŭ pratakole słuchańnia.
Rada Jeŭrapiejskaha sajuza, jakaja vystupała adkazčykam u sudzie, prademanstravała vyčarpalnyja dovady, jakija abhruntoŭvajuć uklučeńnie staršyni Pastajannaj kamisii pa zakanadaŭstvie Pałaty pradstaŭnikoŭ Śviatłany Lubieckaj i jaje namieśnika Alaksandra Amieljaniuka ŭ sankcyjny śpis.
Akurat jany zajmalisia raspracoŭkaj abnoŭlenaha Kodeksa ab administracyjnych pravaparušeńniach, jaki ŭklučyŭ šerah novych artykułaŭ, jakija ŭzmacniajuć adkaznaść u dačynieńni da apanientaŭ režymu Łukašenki.
Sud ES staŭ na bok adkazčyka i 24 maja 2023 hoda adchiliŭ pazoŭ Lubieckaj i Amieljaniuka.
Lubieckaj i Amieljaniuku pradpisana apłacić, u dadatak da ich ułasnych raschodaŭ, raschody, paniesienyja Radaj ES.
Biełaruskaja palityčnaja emihrantka lacieła ŭ Hruziju na samalocie, jaki ekstranna pasadzili ŭ Iranie7
Kamientary
Sapraŭdy, praciahły čas "pracy" va ŭmovach autarytarnaj dyktatury i tatalitaryzmu dziela stvareńnia niepravavych represiŭnych zakonaŭ (navat i tyja nie zaŭsiody abo vielmi advolna vykonvajucca režymam) całkam atrafuje ŭ hetych asobaŭ reštki adčuvańnia taho, što niedzie jašče zastalisia sudy, jakija vykonvajuć całkam źniščany kanstytucyjny pryncyp viaršenstva prava, to bok sud hlaździć nie tolki na litaru zakonaŭ, ale i na adpaviednaść ichnaha sensu jak litary zakonu, tak i kanstytucyi.