Zinaida Furor, Nasta Kraŭčanka, Hierman Citoŭ: chto zastaŭsia na biełaruskaj estradzie paśla čystak?
Pahladzieli, dzie vystupajuć praŭładnyja śpievaki i ci pradajucca kvitki na ich. A jašče adkazvajem na lubimaje pytańnie kamientataraŭ «Našaj Nivy»: «Chto ŭsie hetyja ludzi?!».
Nasta Kraŭčanka
Zorka Nasty Kraŭčanka zaźziała adnosna niadaŭna. Heta studentka teałahičnaha fakultetu BDU, teksty piesień jakoj maksimalna dalokija ad taho, što vykładajuć tym samym teołaham. Dziŭny vybar VNU dziaŭčyna i sama nie moža rastłumačyć: tolki žartuje, što abirała fakultet, ź jakoha budzie blizka biehać vystupać na kancerty ŭ Pałac Respubliki.
Nasta prymała ŭdzieł u pieršym siezonie biełaruskaha šou «Faktar.by» i apynułasia ŭ kamandzie Siarohi. Ale papularnaj stała paśla taho, jak śpieła pieśniu «Ramonki» na rasijskim šou «Zalataj u trendy», a potym vykłała ŭ tyktoku niekalki ŭryŭkaŭ vystupu. Prypieŭ zavirusiŭsia, šmat chto pačaŭ zdymać videa pad hetu muzyku — a roliki Anastasii nabrali miljony prahladaŭ. Darečy, na jutubie ŭ pieśni «Ramonki» 3,2 miljona prahladaŭ.
Paśla hetaha pra dziaŭčynu zhadali na BT i zaprasili pracavać viadučaj. Ciapier Nasta — aktyŭnaja ŭdzielnica prapahandysckich mierapryjemstvaŭ. Jana taksama razam ź inšymi ideałahična nadziejnymi artystami śpiavała pieśniu «Nado!», kab padtrymać Łukašenku na prezidenckich vybarach 2025 hoda.
Vidavočna, što režym sprabuje dahrukacca da padletkavaj aŭdytoryi praz zorak sacsietak.
Zusim chutka — 20 listapada — Nasta robić pieršy solny kancert pad nazvaj «Heta ja». Jaki-niebudź DK — zaškvarnaje miesca dla jaje aŭdytoryi, tamu śpiavačka abrała Prime Hall. Kvitki kaštujuć 64—94 rubli. Na hety momant zastałosia krychu kvitkoŭ na tancplac.
Hierman Citoŭ
Apošnim časam Hierman Citoŭ aktyŭna sprabuje paŭtaryć paśpiachovy šlach rasijskaha śpievaka Šamana, na jakoha za psieŭdapatryjatyčnyja pieśni praliŭsia załaty doždž.
Sioleta Hierman vypuściŭ dźvie prapahandysckija pieśni, kancentracyja cukru ŭ jakich vyšej, čym u ziefiry ŭ šakaładzie. Pieršaja ź ich vyjšła napiaredadni jubileju Łukašenki. Paśla śpiavak vyrašyŭ uziać novy — sajuznadziaržaŭny — uzrovień padchalimstva i pačaŭ pryznavacca ŭ lubovi adrazu Łukašenku i Pucinu.
Ale ž nie vidać, kab takija starańni zaŭvažyli niedzie ŭ vysokich kabinietach. Mabyć, straciŭšy nadzieju, Hierman Citoŭ pačaŭ prasić u padpisčykaŭ adznačać u kamientaryjach da jaho videa Šamana. Biełarus spadziavaŭsia, što rasijski kaleha pa prapahandzie z entuzijazmam jaho padtrymaje i pahodzicca zapisać duet.
Niešmatlikija prychilniki Citova pačali pisać jamu kamplimienty — i amal kožnaha ź ich śpievak dadatkova prasiŭ tehnuć akaŭnt Šamana ŭ instahramie. Niechta ŭsio ž heta zrabiŭ — ale zorka rasijskaj estrady pakul ihnaruje taki pisk ab dapamozie.
Jak by ni chamiŭ u kamientaryjach Hierman tym, chto krytykuje jaho tvorčaść, zdajecca, jon i sam razumieje, što za čatyry hady straciŭ fanataŭ.
Dla svajho kancerta (pieršaha za 7 hadoŭ), jaki adbudziecca 21 listapada, artyst abraŭ daloka nie samuju vialikuju placoŭku stalicy — dom kultury MAZ. I navat tudy pakul nie zdoleŭ pradać usie kvitki, ceny jakich dalokija ad cen kvitkoŭ na kancerty rasijskich zorak. Za svaju tvorčaść Citoŭ prosić usiaho 38-69 rubloŭ. Dla paraŭnańnia: na śpiavačku ANNA ASTI, jakaja ŭ śniežni dvojčy źbiraje «Minsk-Arenu», kvitki kaštavali 141-206 rubloŭ, ale ŭžo ŭsie raspradanyja.
Artysty Moładzievaha teatru estrady
Nie samyja papularnyja zorki kštałtu śpievaka Šyra dy Alaksandry Hajduk prapisalisia na scenie Moładzievaha teatru estrady. Usio ž heta harantuje stabilnyja zarobki.
Zusim chutka — 22 listapada — u teatry terminova (kab zamianić miuzikł «Stryptyz dušy», jaki pavinien byŭ iści ŭ hety dzień pa płanie) praviaduć muzyčnuju premiju «Estradny chit». Nakolki heta budzie cikavaje mierapryjemstva, možna mierkavać pa naminacyjach: «20 hadoŭ na scenie», «Kali pryhoža, tady pryhoža», «i šmat inšych (vielmi niečakanych!)» — pišuć arhanizatary. Akramia zhadanych raniej zorak, u kancercie zadziejničanyja Žanet, ansambl «Vierasy» i Zinaida Furor.
Kvitki pradajucca pa 25-38 rubloŭ, ažyjatažu nie nazirajecca.
Zinaida Furor
Zinaida Furor — hetaki ajčynny anałah Vierki Siardziučki. Adrazu kidajecca ŭ vočy, jak šmat artyst Jaŭhien Jermałkovič skapiravaŭ u Andreja Daniłki: ad stylu svajoj hieraini da jaje pavodzin.
Na mužčynu, jaki skača na abcasach u epatažnaj sukiency, kudy padkładaje kamična vielizarnyja hrudzi, sprabavała skardzicca viadomaja danosčyca Volha Bondarava. Ale abłamała zuby. Bo treba ž viedać, na kaho kidaješsia.
Pa-pieršaje, pieśni dla Zinaidy Furor piša sama niaviestka Łukašenki. Pa-druhoje, sam Jermałkovič čas ad času dla vychadu na scenu apranaje i mužčynski kaścium i addana śpiavaje niejkija prapahandysckija tvory. Naprykład, duetam z Alaksandraj Mielech «Hdie rodiłsia, tam i prihodiłsia» — čarhovy chit Siałuk, jaki ŭ teoryi pavinien zaachvočvać ludziej nie źjazdžać z krainy.
Taksama Jermałkovič źjaŭlajecca artystam Moładzievaha teatru. 23 listapada na jaho scenie adbudziecca kacertna-humarystyčnaja prahrama «Jubilarša», hałoŭnaja zorka jakoj jakraz Zinaida Furor. Darečy, rolu jaje kachanka hraje Andrej Kuniec, jaki pradstaŭlaŭ Biełaruś na dziciačym «Jeŭrabačańni-2006». Voś na hetuju šou-prahramu pradadzienyja ŭsie kvitki (kaštavali jany 30—45 rubloŭ).
Kamientary