Da takich vysnoŭ pryjšli navukoŭcy z Narviehii.
Bulbu časta nie ličać karysnaj harodninaj. Narviežskija vučonyja śćviardžajuć advarotnaje.
Jak piša Sciencenorway, bujnoje daśledavańnie praviali navukoŭcy z Univiersiteta Osła i Narviežskaha instytuta hramadskaha charčavańnia. Jany sabrali danyja apytańnia nasielnictva (77 297 čałaviek) ab zvyčkach charčavańnia, jakoje pravodziłasia na praciahu 1974-1988 hadoŭ. Zatym praz 40 hadoŭ daśledčyki źviazali ŭdzielnikaŭ apytańnia z Rehistram pryčyn śmierci (27 848 vypadkaŭ).
Daśledavańnie pakazała, što ŭ tych, chto jeŭ nie mienš za dźvie bulbiny ŭ dzień u 1970-80-ja hady, śmiarotnaść na praciahu nastupnych 40 hadoŭ akazałasia na 12% nižejšaj u paraŭnańni z tymi, u kaho bulby nie było kožny dzień u racyjonie.
U daśledavańni ŭličvalisia takija faktary, jak uzrost, poł, kureńnie, fizičnaja aktyŭnaść, spažyvańnie miasa, ryby, masła ci marharynu. Vyniki byli adnolkavymi jak dla žančyn, tak i dla mužčyn, a taksama nie zaležali ad vahi, kureńnia i fizičnych praktykavańniaŭ.
Daśledavańnie, vyniki jakoha apublikavanyja ŭ časopisie Nutrition, taksama pakazała, što rehularnaje ŭžyvańnie bulby supravadžajecca nizkaj śmiarotnaściu ad chvarob serca.
Jak tłumačać aŭtary, na kožnyja 100 hramaŭ bolš vysokaha spažyvańnia bulby ryzyka śmiarotnaści ad sardečna-sasudzistych zachvorvańniaŭ źnižałasia na 4%. Jany zaŭvažajuć, što ŭzrovień śmiarotnaści ŭ amataraŭ bulby byŭ prykładna takim ža, jak i ŭ tych, chto šmat spažyvaŭ harodninu ŭ cełym.
Navukoŭcy adznačajuć, što važny sposab pryhatavańnia. Karysnaja mienavita varanaja bulba, jakaja maje nizki hlikiemičny indeks i asabliva bahataja pažyŭnymi rečyvami.
Aŭtary źviartajuć uvahu, što amal vyklučna ŭ takim vyhladzie ŭ Narviehii bulba i spažyvajecca.
Ci varta biełaruskim niezaležnym miedyja brać hrošy ŭ Chadarkoŭskaha? Adkazvajuć Knyrovič, Stryžak i Paŭlučenka5
Kamientary