Vučonyja ź Vialikabrytanii praviali daśledavańnie ŭpłyvu rehularnych fizičnych praktykavańniaŭ na źnižeńnie vysokaha arteryjalnaha cisku. Atrymanyja vyniki ich ździvili.
Sardečnaja niedastatkovaść, mihalnaja arytmija, insult — ich pryčynaj časta źjaŭlajecca vysoki arteryjalny cisk (hipiertanija), jaki hadami zastavaŭsia niezaŭvažanym. U Biełarusi ad hipiertanii pakutuje 40 pracentaŭ nasielnictva.
Daktary śćviardžajuć, što ŭ dadatak da zdarovaha charčavańnia rehularnyja fizičnyja praktykavańni mohuć dapamahčy naturalnym čynam źnizić vysoki arteryjalny cisk.
Daśledčyki z Vialikabrytanii vyvučyli, jakija vidy praktykavańniaŭ padychodziać i ŭ jakoj stupieni.
Dla hetaha jany praviali bujnamaštabny mietaanaliz 270-ci daśledavańniaŭ z udziełam amal 16 000 čałaviek. U daśledavańniach vyvučaŭsia ŭpłyŭ roznych formaŭ fizičnych praktykavańniaŭ na praciahu jak minimum dvuch tydniaŭ na kryviany cisk. Aŭtary vyznačyli narmalny arteryjalny cisk u stanie spakoju nižejšy za 130/85, a vysoki arteryjalny cisk — u dyjapazonie ad 140/90.
U pryvatnaści, navukoŭcy daśledavali ŭpłyŭ čatyroch vidaŭ praktykavańniaŭ: aerobnych (bieh, chadźba, jazda na viełasipiedzie), dynamičnych siłavych (adciskańni, prysiadańni, vypady), vysokaintensiŭnych intervalnych i izamietryčnych (ruchi, pry jakich čałaviek skaračaje myšcu abo hrupu myšcaŭ i ŭtrymlivaje ich u adnym i tym ža stanoviščy na praciahu ŭsiaho praktykavańnia).
Analiz pakazaŭ, što ŭsie razhledžanyja formy praktykavańniaŭ źnižali jak vierchniaje (sistaličnaje), tak i nižniaje (dyjastaličnaje) značeńni, choć i z roznaj efiektyŭnaściu.
Na pieršym miescy pa efiektyŭnaści akazalisia izamietryčnyja praktykavańni (płanka, prysiadańni la ściany abo siłavyja praktykavańni z chvatam na ruki). Jany vyklikali najbolšaje padzieńnie značeńniaŭ u ludziej z hipiertanijaj — u siarednim ad 8,24 da 4 mm rt. sł.
Kambinavanyja praktykavańni pryvodzili da źnižeńnia cisku ad 6,04 da 2,54 mm rt. sł., tolki dynamičnyja siłavyja praktykavańni davali źnižeńnie ad 4,55 da 3,04 mm rt. sł., tolki aerobnyja — ad 4,49 da 2,53 mm rt. st., vysokaintensiŭnyja intervalnyja pryvodzili da źnižeńnia cisku ad 4,08 da 2,50 mm rt. st.
U ludziej sa zvyčajnym ci źlohku padvyšanym arteryjalnym ciskam źnižeńnie było mieniej vyjaŭlenym ci naohuł adsutničała.
Atrymanyja vysnovy ździvili śpiecyjalistaŭ, bo tradycyjna dla źnižeńnia vysokaha arteryjalnaha cisku daktary rekamiendujuć takija aerobnyja treniroŭki, jak jazda na rovary, bieh truškom ci płavańnie.
Aŭtary zadajucca pytańniem, ci nie para abnavić rekamiendacyi nakont hipiertanii. U aktualnych rekamiendacyjach Jeŭrapiejskaha tavarystva hipiertanii zhadvajucca pieravahi izamietryčnych i siłavych praktykavańniaŭ, ale na pieršy płan pa-raniejšamu staviacca aerobnyja praktykavańni.
Jak śćviardžajuć śpiecyjalisty, dla źnižeńnia arteryjalnaha cisku nie patrebnyja vialikija spartyŭnyja ambicyi. Prahułki abo jazda na rovary na śviežym pavietry try-čatyry razy na tydzień i vykanańnie adnaho-dvuch izamietryčnych i siłavych praktykavańniaŭ 15—20 chvilin, jakija taksama možna vykonvać doma, pakažuć svaju stanoŭčuju efiektyŭnaść pry rehularnych zaniatkach užo praz try-čatyry tydni.
Nieabchodna taksama pamiatać, što faktarami naturalnaha źnižeńnia arteryjalnaha cisku źjaŭlajecca zdarovy ład žyćcia z admovaju ad ałkaholu i kureńnia, a taksama mižziemnamorskaja dyjeta ź nizkim utrymańniem soli. Akramia taho, varta paźbiahać zališniaj vahi i praźmiernaha stresu.
Čytajcie jašče:
Aleksin i Tapuzidzis skončyli vajnu za tytuniovy rynak Biełarusi. Abodva prajhrali. A voś chto, zdajecca, pieramoh12
Kamientary