Niaklajeŭ: «Kali Sidorski [vyłučycca], my jamu dapamožam»

Prajšoŭ onłajn ź lideram kampanii «Havary praŭdu», paetam Uładzimiram Niaklajevym.

Ajatałła napisaŭ (ła)Lipień 30, 2010 u 10:47

Spadar Niaklajeŭ, a čym zajmalisia vy i vašaje atačeńnie da taho momantu, jak u vas źjavilisia resursy na hp-kampaniju? Pytańnie źjaviłasia nie prosta tak. Vašaje atačeńnie vielmi lubić paŭtarać, što tolki vy niešta robicie, a astatnija nie robiać ničoha. Z apošnimi niekalkimi miesiacami ŭsio jasna, a voś što było raniej? Čym vy zajmalisia? Jak vy zmahalisia z režymam, jak pracavali ź ludźmi, što viaščali, ab čym maŭčali?

Mahčyma, nie kožny ajatała pra toje viedaje, ale ja — litaratar. I ŭvieś čas zajmaŭsia spravaj, jakoj pavinien zajmacca čałaviek majoj prafisii: pisaŭ.

Pra što viaščaŭ — možna pračytać u maich knihach. Choć by ŭ apošnich: «Centr Jeŭropy», «Kon». U dramie «Armahiedon», jakaja drukujecca ŭ «Dziejasłovie».

Maŭčaŭ pra toje, što jašče nie napisana.

***

Praŭdzieśviet napisaŭ (ła)Lipień 30, 2010 u 11:04

Heta praŭda, što hrošy nie pachnuć?

Što b ja vam ni adkazaŭ — na słova nie pavierycie. Pasprabujcie pryniuchaccca…

Aleś* napisaŭ (ła)Lipień 30, 2010 u 11:28

Spadar Uładzimir, čamu na vašu dumku častka biełaruskaj apazicyi, jakaja nazyvaje siabie «pra-eŭrapiejskaj», chavaje svaje finansavyja resursy i šukaje vašyja? Z čym heta moža być źviazana?

Miarkuju, pošuk finansavych resursaŭ źviazany z tym, što tyja, chto ich šukaje, chacieli b ich znajści.

Źmicier napisaŭ (ła)Lipień 30, 2010 u 12:07

Pavažany spadar Niaklajeŭ, pierš chacieŭ by padziakavać vas za vašuju pracu i za toje, što vy zdoleli kinuć vyklik hetaj anty-biełaruskaj uładzie! Spadziajusia, što ŭ vas usio atrymajecca! Majo pytańnie da vas nastupnaje: vy za nadańnie adzinaj dziaržaŭnaj movy ŭ Biełarusi — biełaruskaj? I ci vy źjaŭlajeciesia prychilnikam paviartańnia nacyjanalnaj symboliki, b-č-b ściaha i hierba Pahonia?

Dziakuj,

Spadziajusia, Źmicier, vas zadavolić vieršavany adkaz. Vierš daŭni, ale ničoha nie źmianiłasia ni ŭ situacyi, ni ŭ maich adnosinach da jaje.

NA 20 LIPIENIA 1999 HODA
Narodu moža zaścić zrok
Biez daj pryčyny.
Dy bačyć Boža kožny krok
Na zvod Ajčyny.

U vočy vam adpłaty čas
Zirnie surova.
Kab dzieci apraŭdali vas —
Viarnicie Movu!

Niama pačatkau i kancoŭ,
Usio — praciah.
Kab nie ŭskipieła ŭ žyłach kroŭ —
Viarnicie Ściah!

Ułady śvierb, što vas skubie,
I słavy śvierb —
Pakińcie ŭsio svajo sabie,
Viarnicie Hierb!

Dalboh, pra heta nie sa zła
Malusia ŭ skrusie,
A kab ziamla vas pryniała
Na Biełarusi.

marta napisaŭ (ła)Lipień 30, 2010 u 13:12

Sp. Niaklajeŭ, što Vy najbolš cenicie ŭ

1.žančynach 2.siabrach

3.kalehach?

Jakimi svaimi jakaściami možacie pachvalicca?

Dziakuj

U žančynach: umieńnie paddavacca lepcy — i zastavacca samoj saboj.

U siabrach: zdolnaść siabravać tady, kali siabravać niemahčyma.

U kalehach: toje, što jany ŭmiejuć rabić.

Pachvalicca mahu ŭmieńniem zastavacca samim saboj, siabravać tady, kali siabravać niemahčyma i rabić toje, što ŭmieju rabić.

Pavieł napisaŭ (ła)Lipień 30, 2010 u 13:27

Sp. Uładzimir, Vy vierujučy čałaviek? Kali tak, to jak vyhladaje Vašaje relihijnaje žyćcio?

Majo relihijnaje žyćcio vyhladaje hetak, jak vyhladaje lubaja ŭnutranaja praca kožnaha čałavieka: niabačna. Nu, kali nie ličyć taho, što blizkija bačać mianie ŭ čas malitvy. Ale možna malicca — i nie być viernikam. Kali malitva — nie ŭnutranaja praca.

aleks_nesterow napisaŭ (ła)Lipień 30, 2010 u 13:38

Spadar Niaklajeŭ,

Jak skansalidavacca, jak nie bajacca, jak vieryć?

Dziakuj!

Prosta skansalidavacca, prosta nie bajacca, prosta vieryć.

Andrejka napisaŭ (ła)Lipień 30, 2010 u 13:43

Pavažany Uładzimir Prakopavič! U mianie da vas jość maleńkaje pytańnie:

— Ci źbirajecieś vy ŭdzielničać u jakaści kandydata na «vybarach» prezidenta Respubliki Biełaruś 2010–2011? Vy ŭžo šmat raz havoryli što: — padumaju, potym vyrašu! ADKAŽYCIE ŬŽO!

Za samy dakładny adkaz- DZIAKUJ!

UŽO ADKAZVAJU — i heta SAMY DAKŁADNY ADKAZ: budu ŭdzielničać u vybarach, kali buduć vybary.

Alena napisaŭ (ła)Lipień 30, 2010 u 14:49

Uładzimir Prakopavič, a jakoje ŭ vas chobi? :)

Alena, ja nie chabist.

jula napisaŭ (ła)Lipień 30, 2010 u 14:51

Viedaju, što Vy lubicie prefierans. Uvohule, Vy azartny hulec? :)

Niekali, upieršyniu sieŭšy za stoł, kab zhulać u prefierans, ja vyjhraŭ 440 rubloŭ. Pry majoj studenckaj stypiendyi (14 rubloj) heta było bolš čym dastatkova, kab adčuć siabie Krezam. Ale tolki hipatetyčna, bo tyja ludzi (adzin — prafiesar miedycyny, druhi — prafiesar etnahrafii, jakija ŭziali mianie hulać trecim, bo treci ź ich kampanii nie pryjšoŭ) hrošy mnie nie addali. Patłumačyŭšy svajo rašeńnie tym, što najaŭnaść ich u takoj kolkaści moža admoŭna paŭpłyvać na maju niesfarmavanuju śviadomaść. Dyk jano j paŭpłyvała: ja tryvać nie mahu žłaboŭ niezaležna ad ich rehalij i zvańniaŭ. Navat niezaležna ad talentu.

Prafiesar miedycyny davoli chutka paśla taho (choć i byŭ prafiesaram miedycyny) pamior, a prafiesar etnahrafii doŭha «adkuplaŭsia», pastaŭlajučy mnie navukovuju, tak by mović, klijenturu: tych, chto žadaŭ stać kandydatam ci doktaram etnahrafičnych navuk, ale ničoha, aproč žadańnia, dla hetaha nie mieŭ. I ja pisaŭ za ich desertycyi, jakija kaštavali bolš za 440 rubloŭ. Značna bolš, tak što ciapier da biełaruskaj prafiesury ja nie ŭ pretenzijach.

Što da taho, ci ja azartny… Nie azartnyja ludzi napačatku śpiakotnaha žniŭnia cicha abirajuć na leciščach apošnija višni. Niedadziaŭbanyja špakami.

nespartovy_4alavek napisaŭ (ła)Lipień 30, 2010 u 14:55

Ci praktykujecie sport? Ci kunajeciesia ŭ pałonku? Biehajecie pa ranicach? Katajeciesia na rovary?

Jak staviciesia da pabudovy ladovych pałacaŭ pa ŭsioj krainie?

Z usiaho vami prapanavanaha vybraŭ by rovar…

Pomniu, jak u dziacinstvie, kali mnie jaho kupili, ja myŭ toj rovar u rečcy i nios dachaty na sabie, kab koły nie zapeckać… A nočču padamaŭsia, kab zirnuć, jak bliskajuć u ciemry śpicy i nikilavanyja abady.

Ź ladovymi pałacami nijakach uspaminaŭ nie źviazana, tamu ja da ich abyjakavy.

Kirył napisaŭ (ła)Lipień 30, 2010 u 15:29

Niedzie u lutym Vy abvieścili pra pačatak kampanii «Havary Praŭdu». Ja pytaŭ u siabroŭ i znajomych, jakija nie karystajucca internietam, kažuć, što pra vas ničoha nie čuvać. Čamu tak adbyvajecca?

Adbyvacca tak moža pa dźviuch pryčynach: ci ničoha nie čujuć — ci ničoha nie kažuć. Chutčej, pa druhoj, bo ŭsie masavaja «kazalniki» ŭ siońniašniaj Biełarusi dla praŭdy pierakrytyja.

borat napisaŭ (ła)Lipień 30, 2010 u 15:36

Čamu vy nie źbirajeciesia padtrymać na vybarach Vitala Rymašeŭskaha, kandydata ad samaj idejnaj, maładoj i pierśpiektyŭnaj palityčnaj siły? Vital sumlenny čałaviek, i zaŭsiody havoryć praŭdu.

Vašyja daradcy suprać Rymašeŭskaha?

Tut takaja dylema: ci mnie padtrymlivać siabie samoha — ci Vitala Rymašeŭskaha. Maju čas padumać.

Uvohule ž i da BCHD (najpierš na Paŭła Sieviarynca), i da Vitala ja adnošusia z pavahaj. Jany robiać toje, što ŭ siońniašniaj Biełarusi treba rabić. Kab biełarusy nie ŭvachodzili ŭ chryścijanskija chramy pahancami.

Aleksiej napisaŭ (ła)Lipień 30, 2010 u 15:52

Vładimir Prokof́jevič, ja iskrieńnie poddierživaju kompaniju «Hovori pravdu», vy diełajetie očień pravilnoje i poleznoje dieło! Ja očień chotieł by prisojediniťsia k etoj kompanii i vot užie miesiac viedu pieriepisku s [email protected] mnie otviečajut, čto vot śviažutsia i… nie śviazyvajutsia… Počiemu tak?! Vam nie nužny aktivisty?!

Tak uvohule nie moža być, my idziem na kantakt navat z tymi, chto nas nie padtrymlivaje. A ŭžo z tymi, chto choča być z nami… Niejkaja tut techničnaja nakładka, abaviazkova raźbiaremsia.

Padajcie svaje kantakty na moj sajt: nekliaev.by

mikola ramanau napisaŭ (ła)Lipień 30, 2010 u 16:01

sp. Nekliaeu. pavaga da tago sto vy robice,adnak u mene ni padymaecca ruka kinut kamen u insyh kandydatau u Prezydenty (lukasenka ne u zalik). adnak sto iost-'sumlennye vybary'?ti (3 razy tfu)2015 prydecca pacynac usio spacatku? ne pytaius u vas,kali 'pa-pravilam'guliat, uzo na Belarusi pavinen vybiracca 3 Prezydent? Brussel.

U inšych kandydataŭ u prezidenty kamianioŭ ja nie kidaju. Ni ŭ jakich kandydataŭ nijakich kamianioŭ. Nam treba damaŭlacca, a nie kamianiami kidacca. Kab paśla hetych vybaraŭ nasamreč było nazvanaje imia novaha prezidenta Biełarusi.

Marcinkievič napisaŭ (ła)Lipień 30, 2010 u 16:44

Vładimir Prokof́jevič, priznanije ničtožnym dohovora ariendy mieždu «Dvižienijem vpieried» i OOO «Tina Vłati» i ožidajemaja pośledujuŝaja likvidacija «Dvižienija Vpieried» stavit pod udar aktivistov kompanii «Hovori pravdu» (kak iźviestno v RB diejstvija ot imieni niezariehistrirovannoj orhanizacii javlajetsia uhołovnym priestuplenijem) možiet jesť smysł pośledovať primieru «Mołodoho Fronta» i zariehistrirovaťsia v Čiechii ili lubom druhom hosudarstvie?!

Usio tak: ułada «źničtožyła» ustanovu «Ruch napierad», kab źniščyć kampaniju «Havary praŭdu». Paprostu: sudzić i sadzić aktyvistaŭ kampanii za dziejnaść ad imia niezarehistravanaj arhanizacyi. Tamu my prydpryniali miery ŭ čymści padobnyja na prapanavanyja vami.

padarozhny napisaŭ (ła)Lipień 30, 2010 u 17:01

Uładzimier Prakopavič!

Jak Vy staviciesia da zaklikaŭ sp. Paźniaka bajkatavać prezidenckija vybary? Ci sapraŭdy bajkot — adzina mahčymy šlach da źmieny isnujučaj palityčnaje systemy na Biełarusi?

Zahadzia dziakuju!

Ja nie vyklučaju bajkot jak adzin z mahčymych scenaroŭ prezidenckich vybaraŭ. Ale hety scenar dla niekaha, nie dla mianie. Jon raźličany na pieramohu ŭ niejkim budučym — nieviadoma jakim. A ja baču mahčymaść pieramohi ciapier — i zrablu ŭsio mahčymaje i niemahčymaje, kab jana adbyłasia. MIENAVITA Z HETAHA BAČAŃNIA (a nie z rasiejskich ci jašče jakich hrošaj) i ŭźnikła kampanija «Havary praŭdu».

U adnačaśsi scenar pieramohi i scenar bajkotu — niesumiaščalnyja.

Amatar napisaŭ (ła)Lipień 30, 2010 u 17:58

Spadar Niaklajeŭ, karystajučysia mahčymaściu chacieŭ by padziakavać vam za vašuju ščyruju pracu! Dziakuj, što nie schavalisia, nie źmirylisia, nie prystasavalisia.

Taksama, chaciełasia b vykazać adnu zaŭvahu pa pracy. «Palavaja praca» dosyć marudna idzie. Ludzi, vielmi doŭha čakajuć adkazaŭ ad kampanii «HP» pa supracoŭnictvu. Adzin moj siabra čakaje ŭžo bolš za 2 tydni. Nielha hublać ludski resurs! Treba jak maha efiektyŭniej pracavać! Ludzi — heta hałoŭnaje! Hrošy tolki treciaja častka nieabchodnaha, ale ž bieź ludziej jany pšyk.

Nu i narešcie majo pytańnie: ci budziecie vy praciahvać jeździć pa rehijonach Biełarusi?

Heta ŭžo druhi zakid pra niaŭvažlivaść da mahčymych aktyvistaŭ kampanii «Havary praŭdu». Značyć, niešta tut jość…

Zrazumieła, što hałoŭnaje — ludzi. Ničoha ŭ ludziej, aproč ich samich, niama.

Pa rehijonach budu jeździć, jak jeździŭ. Choć z kožnaj pajezdkaj het ŭsio bolš składana.

pytańnie napisaŭ (ła)Lipień 30, 2010 u 19:46

Ci majecie prahnoz, kali buduć vybary? Ci chopić času, kab dobra padrychtavacca da ich? Sapraŭdy, pra Vas viedajuć tolki ŭ internecie. A ci pryjdziecie Vy da miljonaŭ nieinternetnych vybarcaŭ?

Vybary adbuducca ŭ hetym hodzie. Novy hod, chutčej za ŭsio, pačniecca z devalvacyi biełaruskaha rubla, što pryviadzie da schudnieńnia i biez taho nie nadta puchnataha biudžetu kožnaj siamji. Papularnaści kiraŭniku krainy takaja niepapularnaja dzieja nie dadaść.

Kali płanavać udzieł u vybarach ad siońnia, zaniacca imi tolki ciapier, dyk dobra padrychtavacca, kaniečnie, niemahčyma. Ale my pačali padrychtoŭku da ich značna raniej.

Z usiaho, što my praanalizavali, sistematyzavali i padrychtavali da dziejańniaŭ vynikaje, što da nas mohuć pryjści miljony vybarcaŭ.

Čub napisaŭ (ła)Lipień 30, 2010 u 20:06

U niepravavoj dziaržavie i abmiežavanaj miedyjnaj prastory «pajści ŭ narod» nie prostym vystupoŭcam, a z kankretnymi dziejańniami — pravilny šlach, kali tolki heta nie piar, a rucinnaja praca z šarahovymi hramadzianami.

Spadar Uładzimir, niekatoryja kandydaty ŭ prezidenty ŭžo zaraz zaklikajuć ludziej vychodzić u dzień vybaraŭ, kali jany buduć adbyvacca pa scenaru 2006 hoda, na płošču. Jak vy ličycie, ci moža Płošča paŭpłyvać na chod padziej?

Płošča, jak i bajkot — adzin sa scenaroŭ prezidenckich vybaraŭ.

Usiaho scenaroŭ čatyry. Ja nazyvaju kožny ź ich (umoŭna, dla siabie) pa ich apratcy. Heta vybary, na jakich:

1. Usie ŭ čornym (abo nibyta vybary, u jakich toje, chto za kaho hałasavaŭ, nazaŭsiody zastaniecca čornym, nieviadomym, bo nie maje nijakaha značeńnia: pieramožca vyznačany zahadzia).

2. Usie ŭ pałasatym (abo vybary z damoŭlenaściu pamiž Rasijaj, Jeŭraźviazam i ZŠA pra kandydata ad apazicyi).

3. Usie ŭ biełym (abo bajkot).

4. Usie ŭ svaim (abo płošča).

Pa pieršym scenary ŭsie zastajucca pry svaich intaresach: Łukašenka pry prezidenctvie, lidery apazicyi pry liderstvie ŭ apazicyi.

Pa druhim scenary Łukašenka nie zastajecca. Ale realizavać heta scenar (va ŭsialakim razie na siońniašni dzień) naŭrad ci mahčyma: u adnosinach da Biełarusi pamiž Rasijaj, Jeŭraźviazam i ZŠA vielmi vialikaja niestykoŭka. Pajści na pieramovy z Zachadam pra niejkaha «parytetnaha» kandydata ŭ prezidenty aznačała b dla Rasii pryznańnie Biełarusi (i ŭžo kančatkovaje) jak całkam niezaležnaj krainy, paŭnavartasnaha subjekta mižnarodnych znosin. Na heta siońniašniaja Rasiija jašče nie hatovaja. Zdavałasia b, voś-voś, voś-voś, ale ŭsio jašče nie i nie.

Treci scenar — heta pieranos pieramohi na niejki (jaki niemahčyma akreślić) termin. Nie vyklučana, što jašče na stolki ž hadoŭ, kolki ŭžo režym isnuje.

Pakolki try nazvanyja scenary abo nie padychodziać, abo naŭrad ci mahčymyja — zastajecca čaćviorty.

Sonny vietach napisaŭ (ła)Lipień 30, 2010 u 20:17

Ci ličycie vy narmalnym padyhryvać Rasii? Ci sapraŭdy heta narmalna źmiešvać maralny vybar z vybaram hieapalityčnym — z vybaram na karyść Pucina? Viedajučy šmat kaho z vašaj kamandy asabista, u mianie niama sumnievu ŭ tym, što jany hatovu matku rodnu zapradaci dziela zadavalnieńnia svajho trybucha? U 2006 hodzie mnohija ź ich albo ihnaravali pracu na karyść adzinaha, albo pracavali na vybarach u rasijskich rehijonach — zašybali kapiejku. Inšyja ž banalna zdali inšaha demkandydata — Kazulina — jak tolki z tym zdaryłasia biada. Jak vam vašaja kamnada? Ci padabajecca?

Kali vam viadoma, chto z majoj kamandy, kamu i za kolki pradaŭ rodnuju matku, kažycie naŭprost: toj, tamu i za stolki. Ale, nakolki ja viedaju, usie našy rodnyja matki pry rodnych dzietkach.

Kamanda źbirałasia z adnym padychodam: prafiesijnym. Prahmatyčnym. Biez razborak, chto kamu vorah. Nie siabravać, a pracavać. I kamanda pracuje. Nie biez chibaŭ. Ale — mienavita praz prafiesijnaść — na siońniašni dzień nie zroblena nivodnaj niepapraŭnaj pamyłki.

A nakont padabajucca, nie padabajucca: jany sami ŭ lusterka hladziacca.

Body art napisaŭ (ła)Lipień 30, 2010 u 20:23

Vładimir, Vy diełajetie intieriesnuju kampaniju! Płanirujet li Vašie dvižienije prinimať učastije v sborie 100.000 podpisiej za vydvižienije Sierhieja Sidorskoho v priezidienty Biełarusi? Kak Vy otnositieś k Sidorskomu lično? Znakomy li Vy s nim? Budietie li Vy jeho poddierživať pośle toho, kak on v sientiabrie zajavit o svojem riešienii priniať učastije v vyborach?

Kali spadar Sidorski vykaža namier vyłučacca kandydatam u prezidenty Biełarusi i nie znojdzie mahčymaści sabrać dla hetaha 100 000 podpisaŭ, my jamu dapamožam. Bo heta budzie krok ryzykoŭnaha čałavieka — navat pry padtrymcy Rasii. Možna skazać: tym bolš pry padtrymcy Raśsii. I navat nie ryzykoŭny — adčajny krok. Nie ciažka ŭjavić, jakuju jon vykliča antyruskuju isteryju — i kim stanie ŭ takim vypadku siońniašni premjer. Akažacca, što jon nie tolki matku rodnuju pradaŭ…

Kazimir napisaŭ (ła)Lipień 30, 2010 u 22:29

1) Vaša kampanija maje ideałohiju \«Siabrujem suprać Łukašenki\». Ludziam hetaha niedastatkova. Jany chočuć znać čym Vaša Biełaruś budzie lepšaj ad jahonaj, jakuju sacyjalna-ekanamičnuju madel Vy prapanujecie, jaki hieapalityčny vybar? Vy ŭchilajeciesia ad adkazaŭ, bo nie majecie pazicyi, ci nie možacie pakryŭdzić aŭtaraŭ stratehii?

2) Ci Vy zhodnyja, što siońnia ŭ Biełarusi idzie zmahańnie nie tolki za demakratyju, ale i za samastojnaść krainy, jaje ekanamičny suvierenitet. I kali ŭ padčas zmahańnia z režymam zhubim niezaležnaść, to nie budzie ni svabody, ni movy, ni historyi, ni kultury. Vy adčuvajecie svaju adkaznaść?

Hramadzianskuju kampaniju «Havary praŭdu» ja raspačaŭ mienavita praz adčuvańnie adkaznaści. Z hetym ža adčuvańniem daviadu jaje da kanca. Da vyniku. Da niemahčymaści stracić niezaležnaść, svabodu, movu, historyju, kulturu.

Žan Žene napisaŭ (ła)Lipień 30, 2010 u 22:42

Vy, pavažany spadar Niaklajeŭ, treba tak razumieć, vielmi praŭdzivy čałaviek, jaki patrabuje praŭdy i ad inšych. U Biełarusi isnuje peŭnaja častka ludziej ź nietradycyjnaj sieksualnaj aryjentacyjaj, i heta praŭda. Adsiul vynikajuć pytańni: jak vy staviciesia da homosieksualizmu ŭvohule, i ci nakiravany vy ŭ svajoj palitycy niejak padtrymlivać źniavažanyja ŭ našaj kansiervatyŭnaj krainie sieksualnyja mienšaści?

Źnievažać nikoha nie źbirajusia. Ale maje asabistyja adnosiny da nietradycyjnaj sieksualnaj aryjentacyi — tradycyjnyja.

Sania napisaŭ (ła)Lipień 31, 2010 u 0:42

Słyšał Vy v 2006 byli v komandie Kozulina. Počiemu? Kakije u Vas siejčas s nim otnošienija?! Takžie mnie intieriesno Vašie otnošienije k Aleksandru Milinkieviču?!

Tak, na minułych prezidenckich vybarach ja byŭ u kamandzie Alaksandra Kazulina. Čałavieka, udziełam jakoha ŭ tych vybarach jany i zapomnilisia. Adnosiny ŭ nas siabroŭskija.

Z Alaksandram Milinkievičam takimi adnosinami, na žal, nie mahu pachvalicca. Ale ŭsio jašče moža być… Pry našaj samaj pieršaj sustrečy paśla prezientacyi kampanii «Havary praŭdu», na jakoj my abmiarkoŭvali płan dalejšych dziejańniaŭ, jon skazaŭ, što paŭsiul i zaŭsiody hatovy padstavić mnie svajo siabroŭskaje, mocnaje, mužčynskaje plačo.

Zaraz roznyja ludzi roznaje pra našyja adnosiny kažuć, ale sam jon słoŭ svaich nazad nie zabiraŭ. I ja nie zabiraŭ u jaho svaju knihu z nadpisam, jaki pačynajecca słovami: «Ź niaźmiennaj pavahaj…»

Vaš vybar napisaŭ (ła)Lipień 31, 2010 u 1:39

Na minułych prezidenckich vybarach kamanda «adzinaha» (tady jašče Milinkieviča) staviła na pra-zachodni viektar padtrymki. Na hetych vybarach vidavočna, što Zachad budzie mieć strymanuju pazicyju. U toj čas, jak niepakoić pazicyja Rasiei, jakaja, naturalna prymušaje Łukašenku da «miru z Kramlom». Vašyja niedobrazyčliŭcy ŭ stanie biełaruskaj apazicyi bačučy svaju biezdapamožnaść pierad uładaj, Kramlom dy Zachadam, a taksama pierad vašaj kampanijaj asabista, raspuścili čutki, što nibyta vy źjaŭlajeciesia «pra-rasiejskim» kandydatam. Naturalna, što heta palityčnaja vałtuźnia i hetakzvanyja «samyja jeŭrapiejskija» chočuć adciahnuć ad kampanii «HP» častku demakratyčnaha aktyvu. Tym nie mienš, ci hatovyja vy iści na kampramis pa vyłučeńniu adzinaha kandydata ź inšymi palityčnymi strukturami ŭ Biełarusi? I ci hatovyja vy na vybarach iści da kanca, to bok albo da vašaha poŭnaha źniščeńnia, albo da samaj ułady? I ci nie budzie ŭ nas «ekskursii Milinkieviča-2» uzoru 2006 hoda? Moža ŭsio vyrašym za 1–2 dni?

Ja vahajusia, pakul prymaju rašeńnie. Być ci nie być. Pryniaŭšy, nie vahajusia.

Naŭprost pytańnie — naŭprost adkaz: hatovy na ŭsio. Jak iści na kampramis (z kožnym i z usimi), hetak i jści da kanca. Da poŭnaha, jak vy kažacie, źniščeńnia, albo da samaj ułady.

Nijakich ekskursij nie budzie.

Havaru p. napisaŭ (ła)Lipień 31, 2010 u 8:01

Uładzimir Prakofjevič, skažycie, a kolki jašče treba vyviesić šyldaŭ i zładzić bankietaŭ, kab takim niachitrym čynam uciercisia ŭ davier da peŭnaj apazicyjnaj častki hramadstva, toj — nievialikaj — što ablapiła internet? A što z astatnim hramadstvam? Prapanuju paviesić adnu vialikuju šyldu ŭ honar (chto tam siarod biełarusaŭ papularny z histaryčnych ci litaraturnych piersanažaŭ?) Piatra I ci A. S. Puškina i zładzić adzin vialiki bankiet na ŭsich biełarusaŭ (tolki biez chrustalnych fužeraŭ na tonkich nožkach, a papraściej, — z čarkami-kubkami). Moža ŭžo tady da vas paciahnucca ludzi? A tak, na maju dumku, usio kvioła niešta ŭ vas vychodzić.

Dziakuj za paradu. Fužery na tonkich nožkach — heta nasamreč niejak kviełavata…

My dumali pra adzin vialiki bankiet dla ŭsich biełarusaŭ. Taki, jaki b nikoli nie skančaŭsia. Ja navat pieśniu pad jaho napisaŭ: «Hulać dyk hulać!» Ale ni ŭ Rasii, ni ŭ Jeŭraźviazie ideju nie padtrymali.

Sierhiej napisaŭ (ła)Lipień 31, 2010 u 10:17

Uvažajemyj Vładimir, na siehodniašnij dień vidno, čto niekotoryje kandidaty (v častnosti, Milinkievič i Sańnikov) nie budut rabotať na pobiedu, a budut rabotať isklučitielno na lehitimaciju riežima v stile «vybory radi vyborov». Ich my znajem po itoham 2006 hoda, kohda pośle riešitielnych prizyvov po TV, hazietach i na Oktiabŕskoj oni strusili i skazali «prichoditie zavtra». Moj vopros k vam śledujuŝij, a kakoj sobstvienno vaš prohnoz na priedstojaŝije priezidientskije «vybory»? V słučaje narušienij (skorieje ritoričieskoje utvierždienije) budietie li vy protiestovať i nie budiet li etot protiest zakončien «ćvietami» na Płoŝadi Osvoboditielej.

Na padobnaje pytańnie ja ŭžo adkazvaŭ.

Sierž napisaŭ (ła)Lipień 31, 2010 u 11:22

Uvažajemyj Vładimir, na siehodniašnij dień vidno, čto niekotoryje kandidaty (v častnosti, Vy) nie budut rabotať na pobiedu, a budut rabotať isklučitielno na lehitimaciju riežima v stile «vybory radi vyborov». Ich my znajem po połnoj biezdiejatielnosti do 2010 hoda. Moj vopros k vam śledujuŝij, a kakoj sobstvienno vaš prohnoz na priedstojaŝije priezidientskije «vybory»? V słučaje narušienij (skorieje ritoričieskoje utvierždienije) budietie li vy protiestovať i nie budiet li etot protiest zakončien «ćvietami» na Płoŝadi Osvoboditielej.

Adkazvaŭ na padobnaje pytańnie raniej.

Babrujčanka napisaŭ (ła)Lipień 31, 2010 u 11:59

jakija vyniki jość ad kampanii «Havary praŭdu», jakuju karyść jany prynieśli biełarusam ci mohuć prynieści, i što budzie z usimi «hovoripravdovcami» jakija źbiehli sa svaich partyjaŭ da vas paśla taho, jak prajduć prezidenckija vybary?

Vyniki dziejnaści kampanii «Havary praŭdu» takija: u nas užo amal paŭhoda DZIEJNIČAJUĆ siabry tych partyj, ź jakimi ŭ tych partyjach tolki HAVARYLI pra dziejnaść.

Paśla taho, jak projduć prezidenckija vybary, treba budzie z m ja n ja c  Biełaruś. Zaniatak — dla ŭsich, pracy chopić i partyjnym, i biespartyjnym. Tak što ni z kim ničoha kiepskaha nie budzie.

daroha napisaŭ (ła)Lipień 31, 2010 u 12:28

dobry dzień. ci majecie vy ŭłasnuju prahramu da prezydenckich vybaraŭ, ułasnaje bačańnie raźvićcia krainy? budu ŭdziačny chacia by za niekalki tezysaŭ. što vy dumajecie nakont pracesu lustracyi ŭ vypadku źmieny ŭłady ŭ krainie? ci patrebnaja lustracyja ŭ biełarusi, kali tak, to jakaja mienavita? jakoje raźviazańnie bačycie dla prablemy dziaržpazyki? ci zastanucca na terytoryi krainy zamiežnyja vajskovyja abjekty paśla źmieny ŭłady? ci budzie źmienienaja kanstytucyja paśla źmieny ŭłady, albo zastaniecca systema kiravańnia «ćviordaj ruki», kab razhrabścisia z usioj spadčynaj siońniašniaha režymu?biełaruskaja atamnaja stancyja — ci praciahniecca realizacyja hetaha prajektu paśla źmieny ŭłady, albo budzie spynienaja?

zahadzia ŭdziačny za razhornuty adkaz.

Prahramu raźvićcia krainy my, biezumoŭna, majem. I pradstavim jaje na abmierkavańnie, kali pojdziem na vybary.

Pra lustracyju ŭ prahramie niama ni słova. Jak i ŭvohule pra rezkija kroki, jakija mohuć vyklikać suproćstajańnie ŭ hramadstvie, sacyjalny vybuch. Akcenty zroblenyja na ekanamičnyja, a nie na palityčnyja prablemy.

Ira napisaŭ (ła)Lipień 31, 2010 u 12:30

Spadar Uładzimir, u tym vypadku, kali vy budziecie prezidentam, ci budziecie vy nadavać pryjarytet u dziaržaŭnych ustanovach maładym ludziam, ci staroj namienkłatury? I što budzie rabicca dla taho, kab maładyja ludzi, jakija atrymali jeŭrapiejskuju adukacyju i žyvuć dy zarablajuć za miažoj, zmahli b pryjechać u Biełaruś i pracavali na karyść svajoj Radzimy, ale ŭ dobrych umovach, to bok ničoha nie stračvajučy dla siabie asabista?

Baluča hladzieć, jak pieraciakaje, pieralivajecca za miežy Biełarusi naša moładź. Pryčym, samaja talenavitaja. Nie bačačy pierśpiektyvy, moładź prosta źbiahaje — i heta realny pakazalnik taho, jak nasamreč pačuvajecca jana ŭ našaj samaj ščaślivaj krainie.

Usie našy najpieršyja, aryjentavanyja na vysokija technałohii, prahramy pa refarmavańni ekanomiki mohuć być realizavanyja tolki z udziełam sapraŭdnych, nasamreč vysokich prafiesijanałaŭ, śpiecyjalistaŭ. U hetyja prahramy (a nie prosta da maci, da chaty) my i budziem sprabavać viartać našu moładź, prapanujučy joj prystojnyja ŭmovy. I nie apošniaj budzie pierśpiektyva karjery, z čym u zamiežžy — najbolšaja prablema. Zarabić tabie tam daduć, ale ŭ elitu patrapić ty zmožaš chiba praz šalony talent ci praz vypadak.

biełaruskamoŭnaja napisaŭ (ła)Lipień 31, 2010 u 16:17

Adkažycie, kali łaska, čamu Vy pravodzicie ruskamoŭnuju kampaniju? Jakija vašy mety: zrabić Biełaruś suvierennaj dziaržavaj abo zrabić asabistuju pieramohu?

Niaŭžo vy dumajecie, što mnie, biełaruskamu paetu, toje, pra što vy pytajeciesia, balić mienš, čym vam?..

Biełaruś i ciapier ruskamoŭnaja kraina. Tak što ŭ hetym nakirunku ja naŭrad ci zmahu «zrabić asabistuju pieramohu». Chutčej — u zvarotnym.

Moisiej Abramovič napisaŭ (ła)Lipień 31, 2010 u 16:58

hdie po-vašiemu prolehajet hranica łojalnosti sobstviennomu hosudarstvu i inostrannym hosudarstvam, vydielajuŝim sriedstva «na boŕbu s riežimom», «na raźvitije diemokratii», «na pravdu» i t. d.? i nie sčitajetie li vy čto biespłatnyj syr, tiem boleje v politikie, byvajet tolko v myšiełovkie?

Šanoŭny Majsiej Abramavič, ja choć i lublu syr, ale nie tak mocna, kab publična asprečvać narodnuju mudraść…

Niechta ź Miechika napisaŭ (ła)Lipień 31, 2010 u 18:29

Prakopavič, a što Vy skažacie Łukašenku pry sustrečy z im — i ŭ vypadku svajoj pieramohi, i ŭ vypadku svajo parazy.

Prapanuju pajechać u Miechika.

awa napisaŭ (ła)Lipień 31, 2010 u 23:54, A kali paśla vybaraŭ «novy» prezident prapanuje vam ministerskuju pasadu (naprakład, min. kultury), vy zhadziciesia ci nie? Uvohule, što vam lepš padabajecca — administracyjna-kamandnaja ci tvorča-indyvidualnaja rabota?

Miarkuju, ja mahu pracavać tolki ci paetam pry paecie, ci prezidentam pry prezidencie. Sam pry sabie.

Čamu tak miarkuju?.. Sprabavaŭ pracavać pry prezidencie paetam — nie vyjšła.

Svaj…jak napisaŭ (ła)Žnivień 1, 2010 u 8:38

Vaša kompanija «Hovori pravdu» porodiła ohromnuju bazu kompromata na niečistych na ruku sudiej, milicionierov, vračiej, tamožieńnikov, a samoje hłavnoje činovnikov nachodiaŝichsia (ivšichsia) u kormuški na samom vierchu, tam fihurirujut samyje hromkije familii. Chorošo tiepieŕ vsie-vsie znajut, a dalšie, čto??? Otstraniť ot vłasti etot mafioznyj sprut Vaša komanda v sostojanii, v sostojanii «otmiesti etot musor», v sostojanii viernuť stranu jeje narodu. Očień pokazatielen v etom płanie rynok Ždanoviči pri vzhladie śvierchu, torhujut nynie tam ludi vsiech nacij i vsiech ćvietov koži, eto chorošo, ibo eto priznak civilizacii i normalnych otnošienij v obŝiestvie, vot tolko Biełarusam miesto ostałoś tolko na «błošinom rynkie». Tak s kakoj cielju Vy viedietie etu piar akciju, pod očieriednoho stavleńnika kriemla ili pod vozroždienije nacionalnoj idiei???

Mocna pramoŭlena, ale ja nie zrazumieŭ, pra što?..

Łužkoŭ u Maskvie pahnaŭ byŭ z rynkaŭ «lic kavkazskoj nacionalnosti». Vynik: rynki spuścieli. Tolki dzie-nidzie babuli handlavali kropam…

Darečy (nie ŭpeŭnieny, praŭda, darečy ci nie?), aniekdot pra babulu i krop. Sam prydumaŭ, dyk i raspaviadaju.

Siadzić babula, pradaje krop. Babula ssochłaja, krop źviały. Novy biełarus na «mersie» spyniajecca, škada jamu babulu stała. Ale aścierahajecca prosta tak hroša dać, kab nie pakryŭdzić, tamu pytaje: «Kolki, babka, krop?» Taja kaža: «Tysiaču». Jon tysiaču padaje, krop nie biare, jedzie… Nazaŭtra toje samaje — i tak kožny dzień. Praź miesiac tysiaču padaje, krop nie biare, jedzie, a babula ŭśled: «Hej, čakaj! Siońnia krop užo dźvie tysiačy!.."

Voś vam i nacyjanalnaja ideja, Svaj…jak.

z Mazyra napisaŭ (ła)Žnivień 1, 2010 u 11:18

Spadar Niaklajeŭ, a što vy možacie skazać tym, chto jašče vahajecca: dapamahać vašaj kampanii, ci nie? Čamu vaša dziejnaść lepšaja i efiektyŭniejšaja za inšyja apazicyjnyja struktury ŭ Biełarusi?

Tym, chto jašče vahajecca, dapamahać našaj kampanii ci nie, mahu skazać: nie vahajciesia! Bo ŭsio značnaje, što budzie adbyvacca ŭ Biełarusi ŭ blizkaj i addalenaj budučyni, budzie adbyvacca z udziełam kampanii «Havary praŭdu». Značyć, z vašym udziełam, kali vy kiniecie vahacca.

Mienski napisaŭ (ła)Žnivień 1, 2010 u 19:06

Nie tak daŭno Milinkievič zajaviŭ (http://d3khjsby2a8d5z.cloudfront.net/?c=ar&i=41650), što budzie čakać pakul ułada sama syjdzie. Ci hatovyja vy čakać pakul ułada sastupić vam? Ci vy budziecie zmahacca za ŭładu?

Nie viedaju, jak Milinkieviču, a mnie ŭłada sastupić nie abiacała. Tak što niama čaho čakać.

sabotaz napisaŭ (ła)Žnivień 1, 2010 u 21:32

Hovoriť pravdu — eto chodiť po tonkomu ldu. Vy riskovyj čiełoviek i eto chorošo. Intierniet stranica — eto chorošo, možiet pora vypustiť hazietu?

Uśpiechov Vam. Žyvie Biełaruś!

Čaho tolki my nie vypuskajem… Mała, nie chapaje, nie da ŭsich traplaje. Tym bolš, što mnohaje zabirajuć, kanfiskujuć. Pašyrajem sietku raspaŭsiudu, drukujem novaje… Znoŭ kanfiskujuć, niekaha aryštoŭvajuć. I hetak miesiac za miesiacam, tydzień za tydniem, z dnia ŭ dzień. Tak što spadziajusia: kali-niebudź dojdzie da ŭsich. Nu, toje, što dojdzie…

Nikola napisaŭ (ła)Žnivień 1, 2010 u 22:50

Płanirujetie li Vy priniať učastije v nieformalnoj vstriečie Priezidienta Rośsii Miedviedieva s biełorusskimi politikami i obŝiestviennymi diejatielami v koncie sientiabria v Moskvie? Kakije voprosy Vy namierieny podnimať na vstriečie?

Kali takaja sustreča adbudziecca i mianie na jaje zaprosiać, dyk što-niebudź ja tam padymu… Jak za savieckim časam žartavali: aproč fužera…

Sa Žłobina napisaŭ (ła)Žnivień 1, 2010 u 23:09

Preč Fiadutu z Proćkaj — i Žłobin vas padtrymaje!

Vo! Na sustrečy ź Miadźviedzievym padymu tost za Fiadutu i Proćku! Kab niekaha sa Žłobina žaba zadušyła!

Tano napisaŭ (ła)Žnivień 2, 2010 u 10:51

Kakije jeŝie ulicy i prośpiekty v Minskie Vy sobirajetieś pierieimienovyvať?

Dziaržynskaha, Śviardłova, Miaśnikoviča, Knoryna, Vaupšasava, Kalinina, Krupskaj, Lenina, Rozy Luksiemburh, Kłary Cetkin, Pulichava, Suvorava dy inšych «słaŭnych synoŭ i dačok biełaruskaha naroda». A ŭ harvykankamie nam kažuć, što niama takoj vulicy, jakuju možna było b pierajmienavać u vulicu imia Vasila Bykava.

Kakoj by vy sdiełali pamiatnik łukašienko? V kakom vidie — konnaja statuja? Łyžieroller na viełosipiedie, s Kolej na rukach?

Badaj što, jon — u łyžach na kani, a koń — na viełasipiedzie…

A ŭvohule pomnik Łukašenku niekali moža stajać. Narmalny. Kali jon zrazumieje, što dla hetaha ŭ čas treba syjści. Kab nie zaminać budučyni tych, chto možna pastavić jamu narmalny pomnik.

Taćciana napisaŭ (ła)Žnivień 2, 2010 u 10:57

Dobryj dzień, pavažany spadar Uładzimir!

choču sprasić Vas jak Vy ličycie u Aleksandra Kazulina taksama była za śpinoj padtrymka — jaho delehirovała na toj skandalny Ŭsiebiełaruski źjezd partyja? Adnak usie skončyłasia turmoj. Čym adroźnivajecca Vaš padychod praz zbor podpisaŭ ad hramadzianaŭ.

Dziakuj

Tym, što ad pačatku my zrobim usio i tak, što i jak patrabujecca zrabić dla ŭdziełu ŭ hetym schodzie. Jano, praŭda, nie aznačaje, što skončycca ŭsio nie moža tym samym…

Arciom napisaŭ (ła)Žnivień 2, 2010 u 10:59

Što Vy budziecie rabić, kali Vas nie puściać na schod? Pa ščyraści, farmalna Vy parušajecie praceduru vyłučeńnia i ŭłady majuć pravu na siłavuju sustreču s Vami.

My nie parušajem praceduru. Pračytajcie: delehaty vyłučajucca ad pracoŭnych kalektyvaŭ ci pa miescy žycharstva. Voś my pa miescy žycharstva i vyłučymsia. A možam jašče i ad pracoŭnaha kalektyvu — nie prablema.

Na vypadak, kali nie puściać, my myjem padrychtavany scenar. Zrazumieła, nie mardabojny.

Siarhiej napisaŭ (ła)Žnivień 2, 2010 u 11:00

Kali pa ŭmoŭnych normach dla vyłučeńnia dielehatam patrebna kala 3000 hałasoŭ, navošta vam źbirać 20 tysiač. Ci nie lepiej enierhiju vašych vałancioraŭ skiravać u bolš karysnych varunkach?

Nidzie nie skazana, što dla vyłučeńnia delehataŭ na Ŭsiebiełaruski narodny schod patrebnaja taja ci inšaja kolkaść hałasoŭ. Jany ŭvohule vyłučajucca biezhałosa. Heta my sami padličyli: kali delehataŭ hetym razam budzie, dapuścim, 5000, dyk kožny budzie pradstaŭlać pryblizna 2000 hramadzian. Voś my i vyrašyli sabrać podpisaŭ u 10 razaŭ bolej, kab u paŭnamoctvach delehata praŭdy vyklučyć lubyja sumnievy.

I jość, kali ŭžo kazać usiu praŭdu, jašče adna meta hetaj akcyi: pravierka struktury napiaredadni vybaraŭ. Jaje mabilnaści, hatoŭnaści. Nichto hetaha nie robić, a my robim. Nie ŭsie navat viedajuć, što ŭ ich strukturach realna adbyvajecca, na što jany zdolnyja. A my viedajem. I heta jość ni što inšaje, jak adkaznyja adnosiny da spravy, što patrabujecca i ad lideraŭ kampanii, i ad kožnaha vałanciora.

pradstaŭlaŭ napisaŭ (ła)Žnivień 2, 2010 u 11:16

Vak krytykujuć: maŭlaŭ, udziełam u Usiebiełaruskim schodzie vy tym samym lehatymizujecie hetu psieŭdaakcyju. Ci nie padajecca Vam, što svaim udziełam Vy pahadžajeciesia z sfalsifikavanymi vynikami refierendumu 1996-ha hoda? Prakamientujcie kali łaska.

Kali kazać pra lehietymnaść, dyk ad 20 lipienia 1999 hoda niama ŭ nas lehietymnaści nijakaj, ni ŭ čym i ni ŭ kim. Tym nie mienš, usie niešta robiać, u niečym udzielničajuć. Da prykładu, u tych ž vybarach prezidenta. U toj čas jak dziejny prezident — nielehitymny. Dyk čamu ŭ vybarach brać udzieł možna, a ŭ schodzie, jaki jość padrychtoŭkaj da vybaraŭ, — nie?

U realnych umovach heta narmalny palityčny krok.

Alesia napisaŭ (ła)Žnivień 2, 2010 u 11:21

Pavažany spadar Niaklajeŭ! Ja pamiataju, što prachodziła kampanija- paštoŭka ŭ administracyju prezydenta. A Vy sami pisali takuju paštoŭku? Što ŭ joj było?

Vierš.

«Staju na asfalcie ja ŭ łyžy abuty…»

Taćciana napisaŭ (ła)Žnivień 2, 2010 u 11:21

Tavaryš Niaklajeŭ, Vy chacia b majecie ŭjaŭleńnie, nakolki KUCYJA pravy delehataŭ? Čaho tady pyžycca?

Vy ŭsio adno ničoha nie dabjeciesia!

Vas ZAULULUKAJUĆ i vyvieduć adtul, jak Kazulina, u kajdankach naŭprost u amierykanku, dzie Vam i miesca z hetkim staŭleńniem da łukašenkaŭskaha zbrodu.

Pierspyktyvu mnie namalavali vy nie lepšuju, ale ŭsio ž u intanacyi adčuvajecca spahada. Za što j dziakuj, Taćciana.

Tolki adno pytańnie: a dzie miesca tych, chto inakš stavicca da, jak vy kažacie, łukašenkaŭskaha zbrodu? U chacie z kraju?..

Daniił napisaŭ (ła)Žnivień 2, 2010 u 11:21

Spadar Uładzimir! Što dumaje na hety kont Kazulin, jaki tuda schadziŭ? Ci nie adhavorvaŭ jon Vas?

Kazulin mianie adhavorvaŭ. Ale niekali ja hetaksama adhavorvaŭ Kazulina.

Źmicier napisaŭ (ła)Žnivień 2, 2010 u 11:25

Jakija prahramnyja rečy Vy chočycie skazać na schodzie? U razhornutym paradku dajcie!

U lubym paradku, ścisłym ci razhornutym — ja chaču skazać prykładna toje samaje, što i vy, Źmicier, i ŭsie skazać chacieli b. Praŭdu na schodzie many.

Grazhdanin napisaŭ (ła)Žnivień 2, 2010 u 11:29

Dobry dzień Uładzimir, vidavočna, što pachod na schod — zajava na ŭdzieł u vybarach. Ci nie ličycie Vy, što paetu lepš zajmacca paezijaj?

Tak vy, grazhdane, dastali hetym schodam, što, moža, sapraŭdy lepš zajmacca paezijaj…

Ihar. Salihorsk. napisaŭ (ła)Žnivień 2, 2010 u 11:36

Ja žyvu ŭ Salihorsku. Na minułym tydni ŭ nas posprabavali źbirać za vas podpisy. Vynik nulavy- ludzi bajacca! Vaš kamientar?

Nie nahavorvajcie, Ihar, na horad šachcioraŭ. Ja dvojčy byŭ u Salihorsku — i abiedźvie sustrečy arhanizoŭvali nie marsijanie. Tam štotam nie ŭsie bajacca, daloka nie ŭsie.

Ja napisaŭ (ła)Žnivień 2, 2010 u 12:12

Ja hladžu, što Vam tut zadajuć pytańni tolki siabry vašaj kamandy. Skažycie, kolki čałaviek treba azadačyć, kab za vychodnyja nastračyć 50 pytańniaŭ? I čamu da vas takaja nizkaja cikaŭnaść z boku stałych naviedvalnikaŭ sajta NN?

Voś pra kaho mała što viedaju, dyk heta pra stałych naviedvalnikaŭ sajta NN. Čym jany adroźnivajucca ad «siabroŭ majoj kamandy», jakija, jak dziatły, tukajuć dy tukajuć pra narodny schod?..

Kali niešta pra siabie raspaviadziecie, budu ŭdziačny.

Ivan napisaŭ (ła)Žnivień 2, 2010 u 12:53

Pytajuś riešiť s synom zadačku. Vładimir, možiet pomožietie?

Dano: 22 ijunia, lidier kampanii HoP, hospodin N. objavił o zavieršienii sbora podpisiej za ulicu Bykova. Po jeho słovam, było sobrano 70 tys. podpisiej.

Čieriez paru niediel, priess-słužba kampanii HoP zajaviła pro konfiskaciju 80 tys. podpisiej. Jeŝio čieriez paru dniej hospodin N. skazał, čto vsieho było sobrano boleje 100 tys. podpisiej, iz kotorych tolko 5 tys. udałoś sochraniť.

Vopros: Kto vriot, a kto hovorit pravdu?

My sabrali i zdali ŭ Minski harvykankam 105 000 podpisaŭ. Ich usie pryniali, usie zarehistravali. Voś i ŭsia praŭda.

Kali ŭ vas zastajucca niejkija matematyčnyja sumnievy, možacie schadzić u harvykankam i podpisy pieraličyć. Miarkuju, za paru dzion spraviciesia. Kali na paru z synam.

Tatiana napisaŭ (ła)Žnivień 2, 2010 u 14:16

Dobry dzień, spadar Uładzimir!!! U mianie da Vas dva pytańni: 1.Tvorčaść i palityka — rečy niesumiaščalnyja, jak Vy, tvorčaja asoba, vyrašyli zajmacca palityčnymi spravami? Paet — heta čałaviek, jaki bačyć raźvićcio padziej z punktu pohladu ptušynaha palotu, ci varta Vam pieratvaracca ŭ lahušku? 2.Vašaje staŭleńnie da vykazvańnia analitykaŭ z nahody mahčymaj admieny vybaraŭ, što budzie inicyjavana Ŭsiebiełaruskim źjezdam?

Sapraŭdny paet, Taćciana, heta mienavita toj, chto sumiaščaje niesumiaščalnaje. I moža być i ptuškaj, i žabaj adnačasova…

Vykazvańnie analitykaŭ pra mahčymuju admienu (a dakładniej, pieranos) vybaraŭ padzialaju, bo takoje mierkavańnie jakraz ja i vykazvaŭ.

AHPešnik) napisaŭ (ła)Žnivień 2, 2010 u 14:26

Spadar Niaklajeŭ, ci hatovyja vy pracavać ź Jarasłavam Ramančukom na hetych vybarach?

Tak, pamiž nami jość damoŭlenaść pra supracoŭnictva. Ja na svaich sustrečach raspaviadaju pra jahonuju pieradvybarnuju prahramu, jon — pra mety kampanii «Havary praŭdu». I heta jość prykład taho, jak pavinny byli b pavodzicca ŭ hety najadkazny čas usie hramadskija arhanizacyi, palityčnyja partyi dy ich lidery.

Aksana napisaŭ (ła)Žnivień 2, 2010 u 14:35

Spadar Niaklajeŭ, čamu inšyja demakratyčnyja lidiery nie imknucca skarystać lehalnuju mahčymaść vystupić choć by na tak zvanym Usiebiełaruskim schodzie, kali ich pazbavili mahčymaści trapić na parłamienckuju trybunu? Ci pravilna toje, što ŭsiebiełaruski schod taksama tatalna zamoŭčvajecca niezaležnymi ŚMI?

Kali my zhodnyja dazvolić uładzie rabić z nami ŭsio, što jana ŭzdumaje, tady ŭsio pieraličanaje vami — pravilna. Kali ž nie — dyk nie.

Ujavicie: kali b pa ŭsioj Biełarusi sotni, tysiačy hramadzian pačali zbor podpisaŭ za svajo svajo vyłučeńnie na narodny schod — što b heta byłodla ŭłady? Ja nie taki naiŭny, kab ličyć, što ŭłada praz heta ruchnuła b, ale zachistałasia b… Dyk treba ž niešta rabić, kab jana chistałasia. I kab urešcie ruchnuła, adlacieŭšy pyłam…

Tatiana Obr napisaŭ (ła)Žnivień 2, 2010 u 17:01

Kłassno — mnoho voprosov ot Taťjan!

Ja — Taťjana Obr.

U mienia vopros po partijam i hraždanskomu obŝiestvu.

1) Kakije problemy vzaimodiejstvija hraždanskoho obŝiestva i oppozicionnych partij

2) Kak vy viditie riešienije etich problem

3)Kak vy viditie stratiehiju dla postrojenija diemokratičieskoho obŝiestva v Biełarusi — osnovnyje zadači — 5–7 hłavnych jeśli možno.

Spasibo.

1.Hałoŭnaja prablema va ŭzajemadziejańni hramadzianskaj supolnaści i apazicyjnych partyj — adviečnaja baraćba za resursy. Niama svaich, unutranych krynic finansavańnia — i tamu ŭsie ŭ kankurencyi za hranty. Nie całkam, ale hetaj kankurencyjaj abumoŭlenaja i składaść pradvybarnaj situacyi.

2. Vyrašeńnie prablemy mahčymaje tolki praz adno: praz refarmavańnie palityčnaj sistemy.

3. Stratehija dla pabudovy demakratyčnaha hramadstva — farmavańnie parłamiencka-prezidenckaj respubliki.

Asnoŭnyja zadačy:

vybarnaść miascovaj ułady;

vybarnaść sudździaŭ;

uviadzieńnie źmiešanaj sistemy vybaraŭ.

Siarhiej napisaŭ (ła) Žnivień 2, 2010 u 17:53

Čamu Vaša kniha «Kon» źjaŭlajecca niejkaj paŭmifičnaj? Jaje nidzie niemahčyma nabyć. Niaŭžo nielha było choć niejkim čynam zrabić tak, kab prychilniki Vašaj tvorčaści zmahli znajści jaje. A to na prezientacyju nie trapiŭ, dyk i ŭsio? A chadzić na palityčnyja i hramadzianskija akcyi, a taksama na kancert Vajciuškieviča, niejak niama cikavaści apošnim časam. Nu anijakaj niama…

Padajcie na moj sajt (nekliaev.by) vašy kantakty — i budziecie mieć knihu «Kon». Na žal, ni ŭ jakija kniharni jaje, mifičnuju, nie biaruć.

* napisaŭ (ła) Žnivień 2, 2010 u 18:39

Kali by Vy stali prezidentam, Vy by raspačyli kryminalnyja spravy suprać tych, chto čyniŭ palityčnyja represii?(Rektary, prakurory, suparcoŭniki MUS i inš)? Ci pahadzilisia by Vy pracavać u kamandzie Zianona Paźniaka «kali što»? Jak Vy staviciesia da KCHP-BNF, BCHD, Maładoha Fronta?

Ja nie prakuror, nie śledčy, uvohule nie supracoŭnik pravaachoŭnych orhanaŭ, kab raspačynać ci spyniać kryminalnyja spravy. Na ŭsio jość (budzie!) zakon.

Pracavać u kamandzie Zianona Paźniaka «kali što» — heta što? Kali jon stanie prezidentam? Dyk u takim vypadku jon i bieź mianie abyjdziecca.

Da ŭsich, chto supraćstaić režymu, maje adnosiny pavažlivyja. Asabliva da maładych. Jany mahli być na inšym baku — i chto, i za što ich papraknuŭ by? Zo toje, što mienavita my, starejšyja, stvaryli varunki, u jakich im treba vybirać, na jakim baku stajać? Za toje, što niechta ź ich choča nie zmahacca, a zarablać hrošy, rabić karjeru — i tym žyć? Jak bolšaść ich ravieśnikaŭ, jakija nie ŭ BCHD ci Maładym froncie, a ŭ BRSM.

Oleh napisaŭ (ła) Žnivień 2, 2010 u 19:09

Hospodin Nieklajev, prizyvaju vas i druhich prietiendientov na priezidientstvo objediniťsia i skorieje užie vybrať jedinoho t. k. bolšie tianuť nielzia. Čto vy lično sami sdiełali dla konsolidacii diemokratičieskich sił?

Siońnia ja idu na radu tvorčaj intelihiencyi, kab pierakanać siabroŭ rady nie pierapyniać praceduru vyłučeńnia adzinaha kandydata. Niahledziačy na ŭsie składanaści i ciažkaści, heta pavinna adbycca.

Anton napisaŭ (ła) Žnivień 2, 2010 u 19:21

Pakul Vy byli paetam, pavažaŭ Vas. Kali niedzie 8–9 miesiacaŭ tamu pačuŭ, što vy budziecie vyłučacca na prezidenta-stała cikava. Zaraz bačučy Vašuju kamandu i kampaniju chaču zapytacca. Niaŭžo vy dumajecie, što prabiełaruskuju spravu možna rabić z takimi ludźmi jak Fabišeŭski, jaki kiruje ŭ vas adnym z rajonaŭ Mienska? u vas ža pałova aktyvistaŭ pabiahuć tudy, dzie hrošy daduć, choć da Kazulina, choć da Niaklajeva, choć da kaho, aby hrošy płacili.))

Ci Fabišeŭski, ci niechta inšy — usie našyja, nie naniatyja za miažoj, ludzi. Žyvyja, sa svaimi niedachopami — jakija jość. Niechta lepšy? Kankretna: chto? Pryvodźcie, sami prychodźcie. Moža, spadabajecca. Nie — dyk nie, razyjdziemsia biez kryŭdaŭ. Chto pabiažyć — nie narakać, nie viartać nie staniem.

Usio žyćcio ŭ źmienach. Pryjduć inšyja.

Pavał napisaŭ (ła) Žnivień 2, 2010 u 19:42

Spadar Uładzimir Prakopjevič, kali vy staniecie prezydentam našaj krainy, jakimi buduj adnosiny z Eŭrasajuzam?

Niekali Biełaruś abaviazkova ŭstupić u Jeŭraźviaz. I jak heta siońnia ni zdasca niekamu dziŭnym — z dapamohaj Rasii, jakaja znojdzie ŭ tym svaju vyhadu. Bo ŭ trubie (naftavaj ci hazavaj) Rasii truba. Joj treba budzie skidvać ź siabie «syravinnaje praklaćcie», pavaročvać ekanomiku ŭ bok sučasnych technałohij, što niemahčyma biez stykoŭki — praź Biełaruś — ź Jeŭraźviazam.

Mnohaje z taho, u što my siońnia ŭpirajemsia, što nie daje nam ruchacca napierad, abryniecca razam ź siońniašnim režymam. U chutkim časie ŭsio źmienicca — i heta praŭda. Jakaja ŭsim nam dapamoža.

Što skazaŭ pra praŭdu Chrystos? Jon złučyŭ jaje ŭ adno z žyćciom i darohaj,. «Ja daroha, praŭda i žyćcio», — skaŭzaŭ syn Božy, pastaviŭšy praŭdu — jak apiryšča — pasiaredzinie ŭsiaho isnaha.

asar napisaŭ(ła) Žnivień 2, 2010 u 22:34

Prakamientujcie dva vykazvańni i adkažycie na adno pytańnie.

----------------------------------------------------------

1.Prodki našy skazali by - Zianon Paźniak Pobud-nastaunik nastaunikau.

2.Pryzyvajučyja da zbroi na vulicu dziela źviaržeńnia apastyleušaha režymu źjaulajucca pravakatarami i čarhovymi revalucyjanierami-navałačču-vyradkami, jakich narmalnyja ludzi abaviazany tut ža pieradavać isnujučaj uładzie, jakoju by jana nie była.

3.Zahadka. U kožnaha čałavieka jeść TO - što ab́jadnouvaje rodnych

pa kryvi i pa duchu, TO - čaho bajacca niecharošyja ludzi i ułady,

TO - što strašniej luboj čałaviečaj zbroi... ŠTO HETA?

(padskazka - TO, ad čaho brachlivyja i staražavyja sabaki pierastajuć

haukać i kusacca)----u adkazie pačatak vialikaha.

Z pakłonam i ščyraju uśmieškaju ASAR.

Moj dzied Jaś kazaŭ: “Kožna piša Jevanhielle ad siabie, choć jano daŭno ŭžo napisanaje dla ŭsich”.

I jašče ja čuŭ ad jaho: “Ščaślivytoj, chto nie ŭstaviŭ svajho radka ŭ knihu Apakalipsisa”.

Andrei napisaŭ(ła) Žnivień 2, 2010 u 23:12

Pryvitańnie pan Niaklajeŭ! Nakolki ja pamiataju vy źbirajeciesia trapić na "usiebiełaruski" schod.

1. Ci jość niejkija praviły pa jakim tudy abirajucca kandydatam na zakanadaŭčym uzroni?

2. Jak narešcie, trapiŭšy, atrymać tam čas ci navat prava na vystup i hołas kab ahučyć toje što vy źbirajeciesia tam skazać?

3. "Havary praŭdu" kampanija stanoŭčaja, ale časam vyhladaje pakazušna, na vaš pohlad ci patrebna jadnacca śviadomym hramadzianam u pachodzie da praŭdy i sumlennaha žyćcia? Dziakuj.

Na pytańnie pra ŭsiebiełaruski schod ja ŭžo niekalki razoŭ adkazvaŭ.

Što da taho, jak iści da praŭdy – razam ci adzinotna?.. Možna i tak, i hetak. U zaležnaści ad taho, dla ŭsich ty jaje chočaš znajści, ci vyklučna dla siabie.

Ingvarr napisaŭ(ła) Žnivień 2, 2010 u 23:57

Spadar Niaklajeŭ, Vy zdolnyja na kanflikt? Na vialiki kanflikt? I kampaniju «Havary praŭdu!» zrabić sapraŭdy žorstkaj i prykraj praŭdaj ab usich? Ci płanujecca tolki krytykavać sučasnuju ŭładu, kazać praŭdu ab siońniašniem stanoviščy ŭ RB (darečy, u vas na sajcie nie zaŭsiody praŭda ), a pra adnosiny z "apazycyjaj" admoŭčvacca ci davać niejtralnyja adkazy.

Nu, i biezumoŭna zhulać u hetuju hulniu z sapraŭdnym azaratam? :)

Voś takija ŭ mianie pytańni. A što ź mianie vaźmieš, z prychylnika Ju. Stankieviča :)

Ja, biezumoŭna, razumieju, što adkazać na hetaje pytańnie całkam niemahčyma. Ale... chacia b hetak... pa viarcham.

Dziakuj za pytańnie. Jano ŭ rečyščy taho, pra što jadumaju.

Budziem vyrašać, što zaŭtra rabić, niešta zrabiŭšy siońnia.

Vital napisaŭ(ła) Žnivień 3, 2010 u 1:57

Spadar Niaklaeu, Piszu lacinicaj, bo zhyvu u Amerycy. Skazhyce chto na vasz pohlad budze lideram ad apazicyi u nastupnyh vybarah? Kaho padtrymae Rasija?

Heta stanie viadoma paśla taho, jak budzie nazvanaja data vybaraŭ.

dažynki napisaŭ(ła) Žnivień 3, 2010 u 2:42

Jak vy staviciesia da Rasiei? Što vy možacie raspavieści ab historyi ruska-biełaruskich adnosin?

Čamu na vašych "sustrečach-kanfierencyjach" i inšych "ranišnikach" tyrčyć piostry łukašenkaŭski ściah? Što heta adznačaje? A ŭvohule, ja liču, što na takich ludziej jak vy-nie treba źviartać TAKOJ vialikaj uvahi, bo źniknicie vy tak ža chutka, jak i źjavilisia.

Parada: kali vy ličycie niekaha nie vartym vašaj uvahi, dyk i ličycie. Nie źviartajcie na jaho ŭvahi ni vialikaj, ni małoj. A vy pytajeciesia, jak ja adnošusia da Rasii? Značyć, niejkuju ŭvahu ŭsio ž vyjaŭlajecie. Pastupajeciesia pryncypami.

Nie pastupajciesia.

Ihar napisaŭ(ła) Žnivień 3, 2010 u 8:04

Mnie vielmi spadabajecca siońniašni himn RB, heta vielmi ŭdały prykład niejtralnasci i zhurtavanasci nycyi; ci prezident Niaklajeŭ budzie dastavać z kuferka niešta staroje i nacyjanalistyčnaje?

I jeŝio. Počiemu Vas nazyvajut prorośsijskim priezidientom? Vas eto obižajet? I niet li žiełanija etot jakoby minus umieło obratiť v plus? Dziakuj.

Pra himn mahu skazać voś što…

Niekali ja i kampazitar Vasil Rainčyk napisali niakiepskuju reč pad nazvaj “Žyvi, Biełaruś!”, jakaja mahła pretendavać na toje, kab stać himnam. Rainčyk — ziamlak Łukašenki, dyk mieŭ spadziavańni. Navat abiacańni niejkija… I ŭsio mnie davodziŭ: “Kali b ty nie pasvaryŭsia z Łukašenkam, kali b nie źjechaŭ…” Nie razumiejučy, što ničoha b nie było, kali b ja navat nie pasvaryŭsia i nie źjechaŭ. Pakolki Rasija pakinuła svaim himnam saviecki, dyk saviecki himn pavinien byŭ zastacca i ŭ Biełarusi. Jon i zastaŭsia. Nu, padabajecca jon vam, dyk padabajecca…

Ciapier pra maju prarasijskaść…Mnohim čamuści nadta chočacca, kab ja Rasiju nienavidzieŭ. Jana takaja, jana hekaja, pravasłaŭnaja, impierskaja, ź joj my ščaścia nie mieli. A z kim my mieli ščaście?..

Davajcie pasprabujem zajmieć jaho sami z saboj, nie vinavaciačy ŭ adsutnaści jaho susiedziaŭ.

Ja lublu Rasiju. Tam, na Vołzie, ź pieršym krykam udychnuŭšy pryvołžskim stepavy viecier, naradziŭsia moj baćka. Heta – luboŭ daradzinnaj pamiaci, luboŭ dušy, serca. Davajcie nie zahadvać našym sercam nie lubić – i ŭsio ŭ nas budzie dobra. Pa lubovi, jakaja navat vyšej za praŭdu.

***

Uładzimir Niaklajeŭ naradziŭsia 9 lipienia 1946 hoda ŭ Smarhoni. Baćka — Niaklajeŭ Prakofij (Prakop) Mikałajevič — ruski, maci — Mahier Anastasija Ivanaŭna, biełaruska. Pražyŭ dziciačyja hady ŭ Krevie. Vučyŭsia ŭ Minskim eletratechnikumie suviazi (1962 — 1966), na adździaleńni paezii Litaraturnaha instytuta (1971, Maskva), skončyŭ fiłałahičny fakultet Minskaha piedahahičnaha instytuta (1973).

Pracavaŭ suviazistam na Poŭnačy, u Sibiry, na Dalokim Uschodzie, radyjomiechanikam u minskim televizijnym atelje. Supracoŭničaŭ u haziecie «Znamia junosti», redahavaŭ biuleteń «Teatralny Minsk», byŭ staršym redaktaram hałoŭnaj redakcyi litaraturna-dramatyčnych prahram Biełaruskaha telebačańnia, hałoŭnym redaktaram časopisa «Krynica», štotydniovika «Litaratura i mastactva». Z 1998 pa 2001 — staršynia Sajuza biełaruskich piśmieńnikaŭ.

Ad lutaha 2010 hoda — lider hramadzianskaj kampanii «Havary praŭdu!»

• 0
• 0
• 0
• 0
• 0
• 0
• 0
• 0