29 studzienia pradstaŭnik Biełaha doma paviedamiŭ, što Ofis pa kiravańni i biudžecie admianiŭ raniejšaje rasparadžeńnie administracyi Donalda Trampa ab prypynieńni nadańnia fiederalnych kredytaŭ, hrantaŭ i inšaj finansavaj dapamohi, piša «Hołas Amieryki».
Havorka ŭ raniej vydadzienym ukazie išła pra prypynieńnie, pačynajučy z 28 studzienia, vydačy ŭsich fiederalnych hrantaŭ i kredytaŭ datul, pakul nie budzie praviedzienaja ich pravierka. Pad zamarožvańnie trapili srodki, pryznačanyja «dla zamiežnaj dapamohi» i «niaŭradavych arhanizacyj».
Ukaz byŭ časova zabłakavany fiederalnym sudździoj paśla taho, jak u Fiederalny sud u Vašynhtonie byŭ padadzieny pazoŭ suprać hetaha rašeńnia. Pazoŭ padali pravaabarončyja hrupy, jakija pradstaŭlajuć niekamiercyjnyja arhanizacyi, uładalnikaŭ małoha biznesu i śpiecyjalistaŭ u halinie achovy zdaroŭja.
Pravaabarončyja arhanizacyi zajavili, što prypynieńnie finansavańnia prahram dapamohi naniasie škodu dziasiatkam miljonaŭ amierykancaŭ. Hienieralnyja prakurory štataŭ, u jakich va ŭładzie znachodziacca demakraty, padali asobny pazoŭ, u jakim zajavili, što prypynieńnie fiederalnaj dapamohi źjaŭlajecca parušeńniem Kanstytucyi i škodzić štatam, jakija raźličvajuć na padtrymku ź fiederalnaha biudžetu.
29 studzienia ranicaj Bieły dom zajaviŭ pra hatoŭnaść adstojvać ukaz u sudzie, adnak paźniej u toj ža dzień Ofis pa kiravańni i biudžecie abjaviŭ pra admienu raniej vypuščanaha dakumienta.
Pres-sakratarka Biełaha doma Kerałajn Levit paźniej patłumačyła, što rasparadžeńnie Ofisa pa kiravańni i biudžecie (OBM) ab admienie ŭkaza aznačaje nie admienu zamarožvańnia fiederalnaha finansavańnia, a tolki admienu dakumienta Ofisa.
Dziajkała: Naša situacyja nie ciahnie na Mižnarodny trybunał u Haazie. Važna, kab praces nad Łukašenkam adbyŭsia ŭ Minsku7
Kamientary