Łatuška adkazaŭ na abvinavačvańni Paźniaka: Pasvarycca nie atrymajecca
«Maja meta — tracić siły na baraćbu nie z vami, a z Łukašenkam».
Kiraŭnik Narodnaha antykryzisnaha ŭpraŭleńnia Pavieł Łatuška adkazaŭ na krytyku ŭ jaho adras z boku Zianona Paźniaka. Pra heta jaho paprasiła radyjo «Racyja».
Łatuška zaŭvažyŭ, što adkazać jon moža ŭ kantekście tych čatyroch hadoŭ, na praciahu jakich jon naležyć da demakratyčnaha ruchu.
«Zianon Stanisłavavič, kali vy pastavili za metu ŭciahnuć mianie ŭ svarku z vami, to nie, nie atrymajecca. Maja meta — tracić enierhiju, siły na baraćbu nie z vami, a na baraćbu z Łukašenkam. I heta źjaŭlajecca majoj hałoŭnaj metaj.
Maja meta — abjadnoŭvać siły. Tamu ja byŭ adnym ź inicyjataraŭ stvareńnia Abjadnanaha pierachodnaha kabinieta, tamu ja padtrymlivaju abranuju prezidentku-elekta, ale jakaja nie ŭstupiła ŭ pasadu, Śviatłanu Cichanoŭskuju. Tamu my sfarmiravali kaalicyju bolšaści ŭ Kaardynacyjnuju Radu, jakaja abranaja niachaj nievialikaj kolkaściu, ale ž usio ž taki tysiačami biełarusaŭ — našych suhramadzian».
Adnosna zaŭvah pra toje, što mienavita jon piersanalna łabiruje sankcyi suprać Biełarusi, Łatuška patłumačyŭ, što vykazvaje ŭzhodnienuju pazicyju bolšaści:
«Ja zajmajusia kaardynacyjaj sankcyjnaj palityki razam z tymi inicyjatyvami, jakija pracujuć na toje, kab sankcyi ŭvodzilisia i byli maksimalna efiektyŭnymi na režym Łukašenki. Tut ja pradstaŭlaju nie tolki svaju pazicyju, a i Abjadnanaha pierachodnaha kabinieta, i bolšaści ŭ Kaardynacyjnaj radzie, i inicyjatyŭ, jakija adkazvajuć za sankcyjnuju palityku».
«Druhoje, što by ja chacieŭ adkazać Zianonu Stanisłavaviču, — ja ŭdziačny vam, šanoŭny Zianon Stanisłavavič, za toje, što Respublika Biełaruś stała niezaležnaj dziaržavaj u 1991 hodzie. Ale, na žal, na hetym ja staŭlu kropku».
Stała zrazumieła, čamu kiraŭnik biełaruskaha Ernst&Young nie zmoh asabista raźvitacca z kalektyvam4
Kamientary