Patrymanaje aŭto pry prodažy časam sprabujuć vydać za bolš novaje. Voś da jakich vykrutasaŭ prybiahajuć.
Mašyna maje dva hady prastoju?
Jaskravy prykład padmanu pry prodažy patrymanaha aŭto — abjava pra Ford Mustang 2018 hoda, vystaŭleny na prodaž u lidskim aŭtakamisie za 21 750 dalaraŭ.
U pieršym radku apisańnia paznačana, što hetaja mašyna «biez prabiehu pa Biełarusi».
Ale pravierka pa VIN pakazvaje, što heta mašyna była pradadziena ŭ ZŠA 11 žniŭnia 2022 hoda. Roŭna praz try miesiacy jana prajšła mytnuju ačystku ŭ Biełarusi.
Atrymlivajecca, što tut jana ŭžo treci hod. I paškodžańni, ź jakimi jana da nas pryjechała, nie vyhladajuć nastolki istotnymi, kab na pošuk zapčastak i ramont mahło pajści dva hady.
Vyznačyć dakładna, kolki hety Ford Mustang za hety čas moh nakalasić pa Biełarusi, niemahčyma, pakolki ŭ aŭtamabila skručany prabieh.
Na momant prodažu ŭ ZŠA prabieh składaŭ 77 203 mili (124 246 kiłamietraŭ). Praz bolš čym dva hady ŭ Biełarusi aŭto pradajecca z zajaŭlenym prabieham 79 tysiač kiłamietraŭ.
Navat pa fota bačna, što stan kresła kiroŭcy nie adpaviadaje zajaŭlenamu prabiehu.
Jak minimizavać ryzyku być padmanutym?
Kali havorka idzie pra aŭto sa Štataŭ, to pieršaje, što treba zrabić, — heta ŭvieści VIN-numar u pošukavik. Amal usie mašyny, jaki jeduć da nas z ZŠA, nabyvajucca tam na strachavych aŭkcyjonach Copart abo IAAI. Infarmacyja ab realizavanych łotach zachoŭvajecca adrazu na niekalkich sajtach, tamu huhlož VIN — samy prosty, infarmatyŭny sposab, pryčym jašče i biaspłatny.
Mnohija daśviedčanyja pradaŭcy pra heta viedajuć i naŭmysna pišuć u abjavie pamyłkovy VIN. Tamu, kali pa paznačanym numary ŭ abjavie aŭto z ZŠA nie huhlicca, varta paprasić pradaŭca vysłać fota numara kuzava na mašynie abo techpašparta.
Kali i heta nie dapamoža, to jość vierahodnaść, što pradaviec vyčyściŭ za hrošy infarmacyju z adkrytaha dostupu.
Kali mašyna sa Štataŭ nie prabivajecca praz pošukaviki, možna nabyć płatnuju spravazdaču Carfax. U joj niama fota aŭtamabila, ale tam zachoŭvajucca danyja ab najaŭnaści avaryjnaha minułaha i vizitach na STA z ukazańniem prabiehu.
Dla pravierki historyi transpartu, jaki doŭha ekspłuatujuć u Biełarusi, dobra padychodzić płatny servis ad av.by. Taksama servis ad «Aŭtamalinaŭki» zachoŭvaje infarmacyju pra staryja abjavy ab prodažy aŭto na ich sajcie, heta dazvalaje ŭbačyć, ź jakim prabieham, u jakim stanie i za jakija hrošy mašynu pradavali raniej. Kaniešnie, pry ŭmovie, što ŭ papiarednich abjavach pradaŭcy pakazvali sapraŭdny numar kuzava. Aproč hetaha, budzie historyja DTZ na terytoryi Biełarusi, historyja prachodžańnia techahladaŭ z pakazańniem prabiehu i šmat inšaha.
Dziajkała: Naša situacyja nie ciahnie na Mižnarodny trybunał u Haazie. Važna, kab praces nad Łukašenkam adbyŭsia ŭ Minsku2
Kamientary