Namieśniku kiraŭnika pradpryjemstva z hrupy kampanij «Santa» dali 10 hadoŭ za bujny chabar
20.03.2024 / 8:0
Ahułam jon atrymaŭ kala $40 tysiač.
Viktar Halančuk. Fota ź jahonaj staronki ŭ adnakłaśnikach
Asudžany — 47-hadovy Viktar Halančuk. Jon z prostaj siamji: jahonaja maci pracavała načalnicaj biletnych kasaŭ u Breście, a baćka byŭ ślesaram na «Santa-Bremary». U Halenčuka žonka i dvoje paŭnaletnich dziaciej.
Viadoma, što jon daŭno pracavaŭ u kampanii «Santa Impeks». Pradpryjemstva zajmajecca budaŭnictvam i hruzapieravozkami, uvachodzić u hrupu kampanij «Santa». Užo ŭ 2007-m Viktar byŭ namieśnikam dyrektara pradpryjemstva, a na 2021-y zajmaŭ pasadu namieśnika dyrektara pa transparcie. Mužčyna kiravaŭ pieravozkami i mieŭ mahčymaść raźmiarkoŭvać maršruty i vykanaŭcaŭ hruzapieravozak.
Nieviadoma, ci braŭ jon chabary raniej, ale pieršy viadomy epizod adbyŭsia ŭ mai 2021-ha — tady jon damoviŭsia z pradprymalnikam, što za štomiesiačny chabar dapamoža jamu atrymlivać lepšyja kantrakty na pieravozki.
Takuju ž schiemu jon praviarnuŭ jašče z dvuma pradprymalnikami. A z adnoj ź firmaŭ jon damoviŭsia, što budzie atrymlivać 1% ad prybytku za pieravozki (paśla adkat pavysiŭsia da 2%).
Ahułam Viktar Halančuk, zhodna z pastanovaj suda, zarabiŭ na hetym nie mienš za 96 tysiačaŭ rubloŭ abo kala $40 tysiač na toj momant. Aryštavali jaho ŭ listapadzie 2022 hoda.
U śniežni 2023 mieniedžaru prysudzili 10 hadoŭ kałonii ŭzmocnienaha režymu i štraf u 111 tysiač rubloŭ. Apielacyja ničoha nie dała — prysud ustupiŭ u siłu.
Čytajcie taksama:
Eks-kiraŭnika homielskaha Bielinviestbanka sudziać pa troch artykułach. Dva ź ich niečakanyja