Hetyja džynsy buduć sioleta samymi modnymi
3.02.2025 / 14:23
Siarod roznych madelaŭ źviarnicie ŭvahu na džynsy-bočki, jakija mohuć dapoŭnić luby vobraz.
Madel džynsaŭ-bočak ad brenda Frame
Modnyja ekśpierty adznačajuć: kali ŭ hetym siezonie vy chočacie zastavacca ŭ trendzie, varta źviarnuć uvahu na džynsy niezvyčajnaha kroju, viadomyja jak «bočki» (barrel jeans). Vizualna ich siłuet sapraŭdy nahadvaje hetuju formu — ad vuzkaj talii štanina pašyrajecca da siaredziny nohi, a zatym pastupova zvužajecca da ščykałatki.
Dziakujučy takomu kroju džynsy vyhladajuć sučasna i niestandartna, nadajučy vobrazu lohkaść i stylnuju rassłablenaść. Jany nie tolki padkreślivajuć postać, ale i zabiaśpiečvajuć kamfort u ruchu, što robić ich idealnym vybaram jak dla paŭsiadzionnych vychadaŭ, tak i dla bolš elehantnych spałučeńniaŭ.
Dyzajniery pa-roznamu ekśpierymientujuć z abjomam, daŭžynioj i pasadkaj. Ad karotkich madelaŭ, jakija adkryvajuć ščykałatku, da padoŭžanych varyjantaŭ, što amal chavajuć abutak.
Ukaročanaja madel džynsaŭ-bočak ad brenda Everlane
Madel džynsaŭ-bočak da samaj padłohi ad brenda Alaïa
Abjom taksama moža źmianiacca: niekatoryja madeli tolki źlohku pašyrajucca ŭ siaredzinie nahi, stvarajučy miakkuju, naturalnuju formu, a inšyja nahadvajuć sapraŭdnyja štany-bałony z maksimalna akcentavanaj šyrynioj.
Źlohku pašyranaja madel džynsaŭ-bočak ad brenda Gap
Supieršyrokaja madel džynsaŭ-bočak ad brenda Tibi
Pasadka varjirujecca ad ultravysokaj, što padkreślivaje taliju i vizualna padaŭžaje nohi, da bolš nizkaj, jakaja stvaraje rassłableny, paŭspartyŭny nastroj.
Madel džynsaŭ-bočak ź vielmi vysokaj talijaj ad brenda Favorite Daughter
Madel džynsaŭ-bočak ad brenda We The Free
Akramia taho, dyzajniery hulajuć z fakturaj i koleram: ad kłasičnaha siniaha i vybielenaha denimu da nasyčanych adcieńniaŭ, pačvorku i kantrasnych radkoŭ.
Madel džynsaŭ-bočak ad brenda B Sides
Tak što džynsy-bočki siońnia — heta nie prosta modny trend, a sapraŭdnaja placoŭka dla ekśpierymientaŭ. Choć kroj vyhladaje dosyć śmieła i niekatoryja jaho krytykujuć praz toje, što jon psuje praporcyi fihury i vizualna kryvić nohi, hetyja džynsy nie mienš praktyčnyja za luby inšy fason. Kab zbałansavać siłuet, lepš ich spałučać z abciahvajučym viercham. Takija džynsy harmanična vyhladajuć z vuzkimi błuzkami i futbołkami, a voś z oversize-rečami mohuć zrabić vobraz zanadta hruvastkim.
Madel džynsaŭ-bočak ad brenda EB Denim