Były kamandzir Pałka Kalinoŭskaha Dzianis «Kit» Procharaŭ raskazvaje, čym ciapier zajmajecca
1.02.2025 / 8:0
U siaredzinie 2024-ha Dzianis «Kit» Procharaŭ pakinuŭ pasadu kamandzira Pałka Kalinoŭskaha. «Naša Niva» daviedałasia, jakija ciapier zadačy ŭ biełaruskaha vajara.
Dzianis Procharaŭ. Fota: denyskyt / Instagram
Jak raskazaŭ Dzianis, jon uziaŭ na siabie ŭsie pytańni, źviazanyja z fondam Kastusia Kalinoŭskaha — praściej kažučy, ź finansavańniem pałka. U bajavych zadačach Procharaŭ ciapier nie ŭdzielničaje.
Jaho praca — naładzić kamunikacyju z arhanizacyjami i vałanciorami pa dapamozie pałku:
«Za apošni čas jość vidavočny adtok dapamohi, jaje stała značna mienš. Mahčyma, tamu što ludzi stamilisia ci mała chto razumieje, jak dapamahčy i kudy źviartacca. Paśla [niadaŭnich] reformaŭ peŭnaja častka tych, chto dapamahaŭ, adviarnułasia ad pałka. Karaciej kažučy, kamunikacyja i davier pad pytańniem, ale połk praciahvaje pracu, jakaja patrabuje značnych resursaŭ.
Škada, ale kali idzie havorka pra dapamohu i resursy, šmat chto ŭsprymaje heta niehatyŭna, bo stavicca da ich jak da nažyvy. Mała chto zadumvajecca, što ŭtrymańnie padraździaleńnia — heta vialikija resursy, i daloka nie ŭsio daje vajskovaja čaść».
Zarobki vajaroŭ ad USU častkova pakryvajuć vydatki na ryštunak, ale zastajucca vydatki na infrastrukturu padraździaleńnia. Akramia taho, treba nabyvać ryštunak vajaram, jakija tolki pryjšli ŭ połk, vydatkoŭvać srodki na žyllo dla bajcoŭ, zapčastki i ramont aŭtamabilaŭ i inšyja rečy, nieabchodnyja dla bajavoj pracy.
Ciapier fond pałka amal nie atrymlivaje achviaravańniaŭ, kaža Dzianis.
«Tym nie mienš ja ŭdziačny tym, chto praciahvaje dapamahać pałku praz fond, vaša dapamoha dachodzić. Niehatyŭny vobraz minułaha kiraŭnictva moh drenna paŭpłyvać na žadańnie dapamahać. Ale kali ŭ pałku adbylisia źmieny, situacyja nie stała lepšaj, niedavier usio roŭna jość.
Ja nie viedaju, što ludziam treba skazać abo pakazać, kab dapamoha była na ŭzroŭni. Prapanuju skantaktavacca tym, chto zacikaŭleny ŭ padtrymcy, i vyrašyć, jak možam supracoŭničać, a taksama adrazu zadavać pytańni, kali jany buduć. Heta datyčyć i dyjaspar, i fondaŭ, i ŭvohule ŭsich arhanizacyj — my adkrytyja da razmoŭ i supracy».
Pad minułym kiraŭnictvam Dzianis maje na ŭvazie «šerych kardynałaŭ» pałka, vajaroŭ z pazyŭnymi «Vaniš» i «Mikoła» (Arciom Vojnič i Mikałaj Dziemidzienka), jakija da siaredziny 2024 hoda hrali značnuju rolu ŭ žyćci padraździaleńnia. Adzin ź ich, «Vaniš», u tym liku zajmaŭsia ŭsimi spravami fondu, i ciapier, kaža Dzianis, u fondzie rasśledujuć złoŭžyvańni taho času. Pracy šmat, tym bolš minułaje kiraŭnictva admoviłasia addavać finansavyja dakumienty — davodzicca pracavać nad ich adnaŭleńniem.
Jurydyčnaja adkaznaść za fond lažyć na Dzianisie, tamu jamu i daviałosia zaniacca finansami pałka. Heta taksama stała adnoj z pryčyn, čamu Procharaŭ adyšoŭ ad bajavoha kirunku pracy.
Dzianis pryvodzić praktyčnyja prykłady, jak ciapier spravy ź finansami ŭ pałka. Jon tłumačyć, što aŭtamabili ŭ padraździaleńni za čas vajny łamajucca i vialikaja častka «ŭžo prosta cudam jeździć».
«Kali ŭziać hetaje pytańnie, to nieabchodna zadumacca nad adnaŭleńniem aŭtaparka padraździaleńnia — zakuplać bolš śviežyja aŭto zamiest biaskoncaha ramontu tych, što cudam žyvyja. Kali kazać pra biahučyja prablemy, to heta ramont pamiaškańniaŭ, pakupka nieabchodnaha abstalavańnia dla zimy, pakupka miedycynskaha ryštunku.
Peŭny čas my nie možam zabiaśpiečyć padraździaleńnie tymi ž samymi FPV-dronami, jakija taksama ŭžo nichto prosta tak nie daje, i ich treba zakuplać. A va ŭmovach ciapierašniaj vajny drony hrajuć vialikuju rolu.
Kudy nakiravać resursy — nie pytańnie, pytańnie ŭ tym, što ich stała značna mienš. I heta jašče miakkaja farmuloŭka, ale trymajemsia. Połk Kalinoŭskaha ad pačatku padtrymlivajecca nieabyjakavymi ludźmi, tymi, kamu naš los važny.
Tamu kali heta buduć čytać tyja, chto dapamahaŭ, ale pa roznych pryčynach spyniŭ heta rabić, chaču skazać — vajna nie skončana, my i dalej zaležym ad vašaj dapamohi!»