Фестываль «Паўночнае ззянне» пройдзе з 13 да 26 лістапада
12.10.2023 / 16:10
9-ы фестываль кіно Паўночных і Балтыйскіх краін сёлета пройдзе пад слоганам «Увага адлегласць».
Скрыншот трэйлера да фэсту
Згодна з задумай, слоган нагадвае, што на адлегласці трэба не забываць адно аднаго і быць уважлівымі да сваіх блізкіх. Адсутнасць знакаў прыпынку паміж словамі «ўвага» і «адлегласць» зусім не выпадковасць. Гэта дае магчымасць па-рознаму счытваць і інтэрпрэтаваць гэта.
Другі год запар кінафестываль «Паўночнае ззянне» будзе паказваць унікальныя фестывальныя стужкі ў гібрыдным фармаце: offline у Таліне і Вільні і online для ўсіх. У online фільмы «Ззяння» будуць зноў даступныя гледачам бясплатна.
Традыцыйны маніфест ад дырэктаркі кінафестывалю Волі Чайкоўскай сёлета набыў незвычайную форму: замест звыклай прозы атрымаўся верш.
«Падзеленасць, адлегласць, на якой мы знаходзімся са сваімі блізкімі, немагчымасць людзей вярнуцца дадому, жыццё ўнутры краіны ў складаных умовах — гэта даволі балючыя тэмы, якія шмат каго трыгераць, — разважае дырэктарка фестывалю Воля Чайкоўская. — Хацелася гаварыць пра гэта на такой мове, якая дапамагла б паглядзець на вельмі балючую побытавую тэму па-іншаму, якая б фіксавала гэтую пакутлівую рэчаіснасць, але адначасова аб'ядноўвала нас. Вельмі доўга я не магла сесці за напісанне гэтага тэксту, хадзіла, думала, як падступіцца. А калі села пісаць, неяк сам сабой нарадзіўся верш».
Над стварэннем візуальнай айдэнтыкі працавала адна з дызайнерак канцэпту «Паўночнага ззяння» мінулага года — Юля Васільчэнка. Адным з асноўных элементаў візуалу фэсту сёлета стала звычайная лінія, якая сімвалізуе мяжу, што падзяліла людзей.
Візуальныя метафары разам з лямпавымі плёначнымі здымкамі ад фатографкі Каці Ігнашэвіч ствараюць сімбіёз, які перадае пачуцці настальгіі і прыемнай меланхоліі. Усё гэта знаходзіць адлюстраванне і ў трэйлеры фэсту. Ён зроблены на стыку некалькіх тэхнік: калажу, глітч-анімацыі і моўшн-дызайну.
Каманда кінафестывалю хутка раскрые змест праграмы фільмаў і адкрые рэгістрацыю для іх прагляду. Падтрымаць каманду фестывалю можна данатам.