BČB-niaviesta Ina Zajcava źjechała z Ukrainy ŭ Šviejcaryju
15.07.2022 / 8:13
BČB-niaviesta Ina Zajcava raskazała Svabodzie, čamu nie choča bližejšym časam viartacca va Ukrainu.
Bolš za 40 biełarusaŭ užo atrymali pastanovy ab departacyi z Ukrainy. U realnaści prablemy z dakumientami moža mieć značna bolš ludziej.
Ina Zajcava, bolš viadomaja jak BČB-niaviesta, stała adnoj ź pieršych viadomych biełarusak, jakija sutyknulisia z prablemami, sprabujučy praciahnuć dazvoł na žycharstva va Ukrainie. Paśla niekalkich biespaśpiachovych vizitaŭ u mihracyjnyja orhany Ina razam z mužam i dziećmi vyrašyła źjechać z Ukrainy, niahledziačy na nabyty va ułasnaść dom pad Kijevam. 11 lipienia siamiejnaja para biełarusaŭ praz Polšču dabrałasia da Šviejcaryi, dzie płanuje zastacca na daŭžejšy čas.
«My sami pra siabie kłapacilisia va Ukrainie»
«Prajechali paŭtary tysiačy kiłamietraŭ za dva dni, — raskazała Ina ŭ razmovie sa Svabodaj. — Pryjechali zaraz u Bern i padalisia tut jak uciekačy, pa ahulnaj pracedury. Nas adrazu raźmiaścili. My prajšli hutarku, zapoŭnili ŭsie nieabchodnyja dakumienty. Zaraz čakajem, kali nas raźmiarkujuć na pastajannaje miesca žycharstva. Budziem čakać, kali ŭsio vyrašycca. My biełarusy i žyli va Ukrainie pa časovym dazvole na žycharstva. Ale šviejcarski advakat nas zapeŭniŭ, što my majem usie padstavy atrymać status uciekača. Skazaŭ, kab my nie pieražyvali, bo navat kali nam admoviać, to jon padaść na dziaržaŭnyja orhany ŭ sud».
Atrymańnie novych dakumientaŭ, jak paviedamili Inie, moža zaniać ad niekalkich tydniaŭ da miesiaca. Adnak pastajannaje žyllo biełarusam mohuć dać i raniej. Ciapier Ina razam ź siamjoj žyvie ŭ prytułku dla ŭciekačoŭ.
«Heta jak internat taki, — raskazvaje Ina. — Nam na siamju vydzielili asobny pakoj. Kormiać tut nas. My pakul za try dni ŭ Šviejcaryi nie patracili nivodnaha jeŭra, nivodnaha franka sami nie vydatkavali na siabie. Vielmi vialikaja padtrymka adčuvajecca ad šviejcarcaŭ, kałasalnaja. U Bernie paŭsiul ukrainskija ściahi. Uciekačoŭ usie padtrymlivajuć».
U domie Iny, jaki zastaŭsia va Ukrainie, ciapier žyvuć unutranyja ŭkrainskija pierasialency. Jak žartuje sama biełaruska, «jany majuć ukrainskija pašparty, i ich nichto pakul nie vyhaniaje z Ukrainy». Nazad pad Kijeŭ Ina ź siamjoj pakul viartacca nie płanuje. Jana kaža, što vusnych zapeŭnivańniaŭ ad ukrainskich uładaŭ, što ŭsio dobra, joj niedastatkova.
«Pakul situacyja va Ukrainie (z atrymańniem zamiežnikami dakumientaŭ dla lehalnaha statusu) nie źmienicca, my nazad nie pajedziem, — kaža Ina. — Niama sensu intehravacca tam, tracić svaje hrošy, arhanizoŭvać pobyt na ptušynych pravach. U hetym vialikaja roźnica pamiž Šviejcaryjaj i Ukrainaj. U Šviejcaryi ŭsio vielmi prosta. Kali ty tut sam možaš siabie zabiaśpiečyć, možaš pracavać, to ty možaš zastacca. Tut daŭno razumiejuć, što ludzi — sami pa sabie vielmi kaštoŭny resurs. Asabliva tyja, chto moža sam pra siabie pakłapacicca. A my va Ukrainie sami pra siabie kłapacilisia».